«Մարիա Կարապետյանն այն պատգամավորներից էր, ով մինչեւ վերջ պնդում էր, որ մենք քաղաքական դիվիդենտներ ենք ստանում ռազմագերիների հարցի քննարկումից: Մենք, ըստ էության, այդ փակ նիստի ժամանակ հասկացանք, թե ինչու էր տիկին Կարապետյանը պնդում, որ այդ հանդիպումը փակ լինի: Որովհետեւ այդ փակ նիստի ժամանակ տիկին Կարապետյանը մեզ հետ, մասնավորապես պարոն Մարուքյանի հետ կռիվ էր անում, թե մենք ինչու ենք բարձրաձայնել Ադրբեջանի զորահանդեսում նախատեսվող այն մտայնության մասին, որ մեր ռազմագերիներին կարող են ցույց տալ»,- այսօր լրագրողների հետ զրույցում ասաց «Լուսավոր Հայաստան» խմբակցության պատգամավոր Անի Սամսոնյանը՝ պատասխանելով Մարիա Կարապետյանի այն պնդմանը, որ ինքը ստել է:
Անի Սամսոնյանը ներկայացրեց իր տեսակետը. «Տիկին Կարապետյանը բերում էր մի փաստարկ, որ ինքը չի կարծում, թե Ադրբեջանը նման բան կանի, որովհետեւ Ադրբեջանը չի խախտում միջազգային կոնվենցիաները: Երբ ի պատասխան նշեցինք՝ չե՞ք տեսնում ինչպես են վերաբերվում մեր ռազմագերիներին, ինչ վատ վերաբերմունք են ցույց տալիս, տիկին Կարապետյանը որեւէ արձագանք չի տվել, ինչի հնարավորությունն ուներ: Նրա ասածն, ըստ էության, այն էր, որ մեր գերիներին Ադրբեջանում վատ չեն վերաբերվում, որովհետեւ մեր պատասխանը նրան ուղղված ենթադրում էր, որ նա միգուցե կասի՝ այո, վատ են վերաբերվում: Բայց նա դա չասաց՝ ըստ էության պաշտպանում էր Ադրբեջանի շահերը»:
Անի Սամսոնյանն ասաց, որ 2,5 տարի է՝ պատգամավոր է, որեւէ մեկին չի զրպարտել, բայց այս վերաբերմունքը պատերազմին, մեր ռազմագերիներին, իրենց պահվածքը՝ որպես պատգամավոր, այս ամբողջ պատկերի կողքին երբ դնում է իրենց պատասխանատվությունը ու քննադատությունը, թե ինչու են զբաղվել ռազմագերիների հարցով, հասկանում է, որ սա պարզապես խայտառակություն է եւ ամոթ. «Դուք չեք պատկերացնի, թե մենք բոլորս ինչ շոկի մեջ էինք այդ նիստի ընթացքում»:
Հռիփսիմե ՋԵԲԵՋՅԱՆ
