«Անի Սամսոնյանը երեկ փակ նիստի ժամանակ հնչած մի միտք է վերագրել ինձ, որը ես չեմ հնչեցրել բացարձակ, սուտ է խոսել»,- ԱԺ-ում լրագրողների հետ զրույցում հայտարարեց «Իմ քայլը» խմբակցության պատգամավոր Մարիա Կարապետյանը:
Երեկ «Լուսավոր Հայաստան» խմբակցության առաջարկությամբ ԱԺ-ն ընդունեց ուղերձ ռազմագերիների վերաբերյալ:
Մարիա Կարապետյանի պատմելով՝ առաջարկել են, որ նիստը փակ կայանա. «Հաճախ հարկավոր է հաշվի առնել հարազատների զգացմունքները այս հարցի վերաբերյալ: Քանի որ ենթադրում եմ, որ միաձայն ընդունմանը պատրաստ չէր «Լուսավոր Հայաստանը», գուցե ընդդիմադիր երեւալու բարդույթը չհաղթահարելու պատճառով երեկ ԱԺ նիստը բացվեց սկանդալով՝ նիստի փակ թե բաց լինելու կապակցությամբ: Ուղերձի բովանդակության վրա չկենտրոնանալը, այլ փակ կամ բաց անցկացնելու վերաբերյալ այս աղմուկ-աղաղակը ընդամենը հերթական անգամ գերիների զգայուն հարցի շուրջ քաղաքական դիվիդենտներ շահելու փորձ է: Պարոն Մարուքյանը փակ նիստի ժամանակ ինձ ասաց, որ ես չպետք է շարունակեմ նման հայտարարություններ անել, ես էլ ասացի, որ եթե իրենք շարունակեն շահարկել այս հարցը, ապա ես էլ շարունակելու եմ օրինակներ բերել, թե նրանք ինչպես են քաղաքական դիվիդենտներ հավաքում գերիների հարցի շուրջ ու բերեցի հերթական օրինակը. Շաբաթներ առաջ սոցմեդիայում տարածվեց մի լուր, թե Ադրբեջանի իշխանությունները հայ ռազմագերիներին ստիպելու են քայլել ռազմական շքերթի ժամանակ: Այս լուրը կառավարության խորհրդակցության ժամանակ մենք քննարկել ենք ԱԱԾ ներկայացուցչի հետ, հարցրել ենք որքան արժանահավատ է այս լուրը, նրանք ասացին, որ ուսումնասիրել են, լուրը ծագում է սոցիալական մեդիայի տիրույթից ու ամենայն հավանականությամբ՝ հայկական տիրույթում ծագած լուր է, այսինքն՝ ապատեղեկատվություն»:
Կարապետյանը պատմեց, որ իհարկե, կարող են պնդել, որ Ադրբեջանի իշխանությունները կարող են անել ցանկացած տիպի ռազմական հանցագործություն, բայց շքերթի ժամանակ ռազմագերիներին ստիպել քայլելը զարհուրելի հանցագործություն է ու կարելի է փակ նամակով միջազգային գործընկերներին գրել, ոչ թե հրապարակային՝ հաշվի առնելով ռազմագերիների հարազատների զգացմունքները: Ըստ պատգամավորի, միեւնույն է, միջազգային կառույցների արձագանքը նույնն էր լինելու՝ Ադրբեջանին ասելու էին՝ չհամարձակվեք դա անել:
Կարդացեք նաև
Ըստ Կարապետյանի, լուրը հրապարակայնացրեց Մարուքյանը, հետո «ինքն էլ հերոսաբար դա լուծեց». «Մարուքյանը ինձ անվանեց ադրբեջանասեր եւ թրքասեր, իսկ տիկին Սամսոնյանը հայտարարությունների ժամին նույնը կրկնեց»: Նա վստահեցրեց, որ այդքան տեսանյութերից հետո, որոնք համացանցում եղել են, երեւակայությունից դուրս է կանգնել, ասել, թե Ադրբեջանը մեր գերիներին լավ է վերաբերվում, այդ խոսքերն իրեն վերագրում են:
Հռիփսիմե ՋԵԲԵՋՅԱՆ
