Հանդիսանալով Հայաստանի Հանրապետության գիտական հանրության մաս, չենք կարող անտարբեր մնալ հանրապետությունում ընթացող քաղաքական գործընթացներին և, կարծում եմ, պարտավոր ենք արտահայտել մեր քաղաքացիական դիրքորոշումը:
Հաշվի առնելով 2018թ.-ից հետո Հայաստանի Հանրապետության իշխանությունների կողմից վարվող ռազմատնտեսական և դիվանագիտական քաղաքականության ձախողումը, մասնավորապես՝ գիտության, կրթության, բժշկության, տնտեսության տարբեր ճյուղերի, բանակաշինության և այլ ոլորտներում լրջագույն բացթողումները, ինչպես նաև պետական կառավարման տարբեր ոլորտներում կադրային սխալ քաղաքականության իրականացումը և պետական առանցքային պաշտոններում կամայական նշանակումները, հասարակությանը տարբեր շերտերի բաժանումը և պառակտումը համարում ենք ներկայիս կառավարության ձախողված քաղաքականության արդյունք:
Նոյեմբերի 9-ին ստորագրված եռակողմ հայտարարությունը, ըստ որի հայ ժողովուրդը կորցնում է իր պատմական հայրենիքի զգալի մասը, ինչն, ըստ էության, դիվանագիտական պարտության և ռազմաքաղաքական իշխանության կողմից անհեռատես քաղաքականության արդյունք է:
Սեփական սխալներն ու թերացումները չընդունելը, մեղքի բաժինը այլոց վրա բարդելը, պատասխանատվությունից խուսափելը հանգեցրեց ներկայիս իրականությանը՝ վտանգելով մեր պետականության վերջին հանգրվանը: Ստեղծված իրավիճակն էլ ավելի է ակնառու դարձրել ոլորտային թերացումները, խորացրել հասարակության բևեռացվածությունը, ժողովրդին հասցնելով տնտեսական և քաղաքական ճգնաժամի նոր փուլ:
Ստեղծված իրավիճակի ամբողջ պատասխանատվությունը կրում է գործող իշխանությունը, որը, մեր խորին համոզմամբ, ի զորու չէ երկիրը հանել խորացող ճգնաժամային վիճակից:
Ստեղծված քաղաքական, տնտեսական և կառավարչական ճգնաժամից երկիրը դուրս բերելու համար պահանջում ենք՝
– ՀՀ վարչապետի և կառավարության անհապաղ հրաժարականը
– Ժամանակավոր կառավարության ստեղծում՝ կազմված բացառապես փորձառու, հմուտ, պետականամետ և բանիմաց մասնագետներից՝ անկախ քաղաքական հայացքներից և կուսակցական պատկանելիությունից, որի առաջնային խնդիրը պետք է լինի ներքաղաքական իրավիճակի և տնտեսության կայունացումը, արտաքին քաղաքականության հայանպաստ ռազմավարության մշակումը և ԱԺ արտահերթ ընտրությունների կազմակերպումը:
Հարգելի գործընկերներ, հերթական անգամ չարդարացան հայ քաղաքացու սպասումները և հույսերը, փոխարենը կորցրեցինք նաև մեր փառահեղ հաղթանակի, գոյության և պայքարի խորհրդանիշը: Ստեղծված իրավիճակում և հետագա զարգացման գործընթացներում յուրաքանչյուրս ունի պատասխանատվության սեփական բաժինը:
ՀՀ ԳԱԱ «Հայկենսատեխնոլոգի» գիտաարտադրական կենտրոն
ՊՈԱԿ-ի գիտական խորհուրդ
