«Այսօր աննախադեպ բան է տեղի ունեցել: Ամենայն հայոց կաթողիկոսը եւ Մեծի տանն Կիլիկիո հայրապետը միացել են վարչապետ Նիկոլ Փաշինյանի հրաժարականը պահանջողներին: Ինձ համար տարօրինակը միայն հրաժարականի պահանջը չէ, որն ամբողջությամբ քաղաքական է»,-ԱԺ լիագումար նիստում այսօր հայտարարեց անկախ պատգամավոր Արման Բաբաջանյանը:
«Տարօրինակը հոգեւոր առաջնորդների կողմից կոչ անելու համար ընտրված օրն է՝ այն օրը, երբ հրապարակում հավաքված քաղաքական ուժերը հրաժարականի վերջնագիր ներկայացրին վարչապետին: Կարելի էր այդ հրաժարականը պահանջել ավելի վաղ, անցյալ շաբաթ օրը կամ կիրակի: Բայց մեր երկու հոգեւոր պետերը որոշեցին իրենց պահանջը միացնել քաղաքական ուժերի պահանջին՝ ավելի սրելու իրավիճակը եւ չմտածելով հետեւանքների մասին»,-նշեց Արման Բաբաջանյանը:
Ըստ նրա՝ եկեղեցին պետք նպաստեր հասարակական համերաշխությանը եւ կոչ աներ իջեցնել կուսակցական դրոշները. «Եկեղեցին հոկտեմբերի 27-ից հետո, 2004թ.-ի ապրիլի 13-ից հետո, մարտի մեկից հետո որեւէ մեկի հրաժարականը չպահանջեց: Ոչ միայն հրաժարական չպահանջեց, ավելին՝ կանգնեց մեր պետականության ողնաշարը ջախջախող պետական այրերի կողքին»:
Կարդացեք նաև
Հիշեցնենք, որ նոյեմբերի 16-ին գերագույն հոգեւոր խորհուրդը հանդես եկավ հայտարարությամբ՝ վարչապետին եւ ընդդիմությանը հորդորելով զերծ մնալ ատելություն ու թշնամանք պարունակող հայտարարություններից: «Անցնող այս ժամանակահատվածում կայացված որոշուﬓերի, հակամարտության այսօրինակ հանգուցալուծման և ազգային համերաշխության վերականգնման համար, ﬕﬕայն օրինականության նկատմամբ անվերապահ հարգանքով, պետք է պատասխանատվություն կրեն բոլոր պատկան մարմինների իրավասու պաշտոնյաները՝ չբացառելով նաև հրաժարականների հավանականությունը»,-այդ թվում ասված է հայտարարության մեջ:
Լուիզա ՍՈՒՔԻԱՍՅԱՆ
