«Նիկոլ Փաշինյանը հայտարարում է, թե իր հրաժարականի հանրային պահանջ չկա: Եկեք հասկանանք: Նրա հրաժարականը պահանջում են խորհրդարանական ուժերը՝ բացի իր քաղաքական ուժից, ՀՀ արտախորհրդարանական բոլոր քաղաքական ուժերը, ՀՀ նախագահը»,-ԱԺ լիագումար նիստում այսօր հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:
Նա շարունակեց թվարկել. «Այսօր Ամենայն հայոց կաթողիկոսը եւ Արամ Ա կաթողիկոսը պահանջել են նրա հրաժարականը եւ հորդորով դիմել նրան: Օր առաջ հրաժարականի պահանջով հանդես են եկել ԳԱԱ-ն, ԵՊՀ-ն, մտավորականության, հ/կ-ների շատ ներկայացուցիչներ: Ամեն օր տարբեր մարզերում եւ Երեւանում նրա հրաժարականի պահանջով աննախադեպ բողոքի ակցիաներ են: Պահանջին միանում են տասնյակ եւ հարյուր հազարավոր հայրենակիցներ, որոնք գուցե հրապարակում չեն, որովհետեւ կորոնավիրուսով պայմանավորված ճգնաժամային իրավիճակ է, որի պատասխանատուն եւս իշխանությունն է: Պահանջին միանում են նաեւ իրենց զավակներին կորցրած անձանց մեծամասնությունը»:
Ապա Զոհրաբյանը հարցադրմամբ դիմեց Նիկոլ Փաշինյանին՝ ասելով, որ պատասխանն ակնկալում է ոչ նրա խոսնակից. «Սա հանրային պահա՞նջ է, թե ոչ, պարոն Փաշինյան: Թվարկած կառույցները, երկու վեհափառերը ձեզ հորդորում են երկիրը չտանել ցնցումների»:
Կարդացեք նաև
Լուիզա ՍՈՒՔԻԱՍՅԱՆ
