«Լուսավոր Հայաստան» խմբակցության նախաձեռնությամբ այսօր ԱԺ-ն փակ ձեւաչափով քննարկեց հայ ռազմագերիների եւ գերեվարված քաղաքացիական անձանց խնդիրը, եւ կազմվեց ուղերձ-հայտարարություն՝ հետեւյալ բովանդակությամբ.
«ՀՀ ԱԺ-ն, հիմնվելով ՄԱԿ֊-ի 1948թ.-֊ի Մարդու իրավունքների համընդհանուր հռչակագրի, Ռազմագերիների հետ վարվելակերպի մասին 1949թ-ի Ժնևյան կոնվենցիայի, Պատերազմի ժամանակ քաղաքացիական բնակչության պաշտպանության մասին 1949թ֊-ի Ժնևյան կոնվենցիայի, Մարդու իրավունքների և հիմնարար ազատությունների պաշտպանության մասին 1950թ-ի եվրոպական կոնվենցիայի, Ռասայական խտրականության բոլոր ձևերի վերացման մասին 1965թ֊-ի միջազգային կոնվենցիայի և Մարդու իրավունքների ու մարդասիրական իրավունքի նորմեր սահմանող այլ միջազգային պայմանագրերի, միջազգային սովորութային իրավունքի, քաղաքակիրթ ազգերի կողմից ճանաչված միջազգային իրավունքի սկզբունքների վրա,
-Հաշվի առնելով հայկական և ադրբեջանական կողմերի հանձնառությունը վերադարձնելու գերության մեջ հայտնված բոլոր անձանց եւ զոհվածների դիերը,
-Արձանագրելով, որ Ադրբեջանն արհեստականորեն ձգձգում է գերիների եւ դիերի վերադարձի գործընթացը, ակնհայտորեն թաքցնում է իր հսկողության ներքո հայտնված ռազմագերիների և անազատության մեջ գտնվող այլ անձանց իրական թիվը, շարունակում է դաժան, անմարդկային, արժանապատվությունը նվաստացնող վերաբերմունքը, խոշտանգումները, ֆիզիկական և հոգեբանական տառապանքները,
Կարդացեք նաև
-Խստորեն դատապարտելով ադրբեջանական կողմի՝ իր ԶՈՒ ներկայացուցիչների կողմից բացառիկ ցինիզմով խոշտանգումների, արժանապատվությունը նվաստացնող եւ այլ անմարդկային արարքների տեսագրումն ու տարածումը ԶԼՄ-ներով եւ սոցցանցերով,
-Հաշվի առնելով Ադրբեջանի իշխանությունների համակարգային եւ նպատակաուղղված քաղաքականությունը՝ ուղղված էթնիկ հայերի նկատմամբ ատելություն և թշնամանք բորբոքելուն, աշխարհի տարբեր մասերում հայերին սպանելուն, խոշտանգելու եւ բռնության այլ դրսեւորումների հերոսացմանը, ՀՀ ԱԺ-ն ուղերձով դիմում է միջազգային հանրությանը՝ ՄԱԿ-֊ի Մարդու իրավունքների խորհրդին, ՄԱԿ-֊ի խոշտանգումների դեմ կոմիտեին և Խոշտանգումների կանխման ենթակոմիտեին, ՄԱԿ-ի Մարդու իրավունքների գերագույն հանձնակատարին, Ռասայական խտրականության վերացման կոմիտեին, Եվրոպայի խորհրդի մարդու իրավունքների հանձնակատարին, Խոշտանգումների կանխման եվրոպական կոմիտեին, Կարմիր խաչի միջազգային կոմիտեին և Մարդու իրավունքների պաշտպանությամբ զբաղվող այլ միջազգային ու ազգային կազմակերպություններին, կառույցներին և անձանց, միջխորհրդարանական կազմակերպություններին,
ԵԱՀԿ Մինսկի խմբի համանախագահ երկրներին եւ կոչ է անում.
-Հորդորել Ադրբեջանին անհապաղ հայկական կողմին հանձնել իր վերահսկողության ներքո գտնվող ռազմագերիներին, ներկալված եւ անազատության մեջ գտնվող այլ անձանց,
-Պահանջել Ադրբեջանից անհապաղ դադարեցնել
խոշտանգումները, անմարդկային և դաժան վերաբերմունքը հայ ռազմագերիների, ներկալված եւ անազատության մեջ գտնվող այլ քաղաքացիական անձանց նկատմամբ,
-Պարտավորեցնել Ադրբեջանին դադարեցնել վերոնշյալ կոպտագույն խախտումների դրդապատճառ հանդիսացող հայատյացության քաղաքականությունը հանրային կյանքի բոլոր ոլորտներում՝ ուսումնական հաստատություններում, հասարակական, ռազմական և քաղաքական գործիչների հանրային խոսքում, ԶԼՄ-ներում, սոցիալական ցանցերում եւ ցանկացած այլ դրսեւորման մեջ,
-Առավելագույն ջանքերով ու իրական քայլերով դադարեցնել քաղաքակիրթ աշխարհի համար անհանդուրժելի Ադրբեջանի հայատյաց քաղաքականությունը, այդ թվում՝ մարդու իրավունքների ու արժանապատվության ակնհայտ ոտնահարման, պատերազմական հանցագործությունների և ստանձնված միջազգային պարտավորություններից ամեն կերպ խուսափելու անսանձ քաղաքականությունը,
-Գործուն միջոցներ ձեռնարկել՝ միտված Ադրբեջանի կողմից մարդու իրավունքների՝ միջազգային իրավունքով եւ միջազգային մարդասիրական իրավունքով ստանձնած պարտավորությունների հարգմանն ու խիստ պահպանմանը»:
Ուղերձն ընթերցած «Լուսավոր Հայաստանի» ղեկավար Էդմոն Մարուքյանը հայտնեց, որ այն կթարգմանվի եւ կուղարկվի համապատասխան կառույցներին՝ որպես իրենց միասնական քաղաքական կամք:
RA National Assembly session took place
Ապա «Իմ քայլը» խմբակցության ղեկավար Լիլիթ Մակունցն ընդդիմությանը շնորհակալություն հայտնեց քննարկման կազմակերպման եւ փակ ձեւաչափին ըմբռնումով մոտենալու համար:
Իսկ «Բարգավաճ Հայաստան» խմբակցության քարտուղար Արման Աբովյանն իր հերթին ասաց. «Մենք կողմ կքվեարկենք, բայց փակ քննարկման ձեւաչափում ոչ ԲՀԿ-ն, ոչ առհասարակ ԱԺ-ն, հուզող հարցերի որեւէ պատասխան չստացան»:
Նշյալ հայտարարությունն ընդունելու հարցը քվեարկության դրվեց եւ ընդունվեց միաձայն՝ 100 կողմ ձայներով:
Լուիզա ՍՈՒՔԻԱՍՅԱՆ
