Ազգային ժողովն այսօր առաջին ընթերցմամբ քննարկում է ՀՀ քրեական նոր օրենսգրքի նախագիծը: Արդարադատության նախարար Ռուստամ Բադասյանը զեկուցեց, որ 2003թ.-ին ընդունված քրեական օրենսգիրքն այսօր ներքին հակասություններ, թերություններ եւ բացեր ունի. «Այս նախագիծը սահմանում է քրեական օրենսդրության խնդիրները, հանցագործություն գործած անձի հանդեպ համարժեք պատիժը, նրա սոցիալականացումը: Ազատազրկումը պետք է դիտվի որպես ծայրահեղ միջոց: Հստակ ամրագրվել է, որ առաջին անգամ ոչ մեծ ծանրության հանցանք կատարած անձը չի կարող դատապարտվել ազատազրկման: Վերանայվել է պատիժների համակարգը, ընդարձակվել է ազատազրկմանն այլընտրանք հանդիսացող պատիժների ցանկը»:
Բադասյանի փոխանցմամբ՝ այս նոր օրենսգրքով նոր պատժատեսակներ են, օրինակ, տնային կալանքը, օտարերկրյա քաղաքացուն ՀՀ տարածքից վտարելը. «Նախատեսվել է, որ ազատության սահմանափակում պատժատեսակի կիրառման դեպքում կարող են օգտագործվել էլեկտրոնային հսկողության միջոցներ, որոնցով կվերահսկվի անձի վարքագիծը»:
Ինչ վերաբերում է ազատազրկման տեսքով պատժի նշանակմանը՝ Ռուստամ Բադասյանը հայտնեց. «Առկա է կարճատեւ ազատազրկման գաղափարը, որոշակի շեմերի կիրառումը, իսկ մեղմացնող եւ ծանրացնող հանգամանքների միաժամանակյա առկայության դեպքում արարքը պետք է մեղմացնող որակվի»:
Լուիզա ՍՈՒՔԻԱՍՅԱՆ
