Ռուս խաղաղապահ ուժերը Լեռնային Ղարաբաղի տարածքում կատարում են շուրջօրյա մշտադիտարկում։ Այս մասին այսօր ճեպազրույցում ասել է ՌԴ ՊՆ ներկայացուցիչ, գեներալ-մայոր Իգոր Կոնաշենկովը։ Նրա ներկայացմամբ՝ կրակի դադարեցման ռեժիմը պահպանվում է շփման գծի ամբողջ երկայնքով, խաղաղապահների ինժեներական ստորաբաժանումները շարունակում են տրանսպորտային տեղաշարժի վերահսկումն եւ հսկիչ անցագրային կետերի կահավորման աշխատանքները․« Ռուս խաղաղապահների ջանքերով ապահովվում է բնակիչների վերադարձն իրենց մշտական բնակության վայրեր, տրամադրվում է հումանիտար օգնություն, վերականգնվում են քաղաքացիական ենթակառուցվածքները»:
Իգոր Կոնաշենկովի խոսքով՝ Հայաստանից Լեռնային Ղարաբաղ են վերադառնում խաղաղ բնակիչներ, մեկ օրում ԼՂ է վերադարձել եւս 859 մարդ․«Խաղաղապահների տեղակայումից ի վեր ավելի քան 34.000 փախստական է վերադարձել։ Ռուս խաղաղապահների պատասխանատվության գոտում ավարտվել է գազատար խողովակի եւ կապուղիների նորոգումը: Վերականգնվել է 12 կմ գազատար խողովակ եւ 15 կմ կապուղի։ Շարունակվում են էլեկտրական հաղորդալարերի վերականգնման աշխատանքները, մեկ օրում վերականգնվել է 2 հենակետ եւ ավելի քան 2 կմ էլեկտրական հաղորդալար»:
Ռուս խաղաղապահներն, ըստ Իգոր Կոնաշենկովի, շարունակում են Լեռնային Ղարաբաղի տարածքում պայթյունավտանգ օբյեկտների վնասազերծումը․ մեկ օրում ականազերծվել է ավելի քանի 1 հեկտար տարածք, 1 կմ ճանապարհ, հայտնաբերվել եւ ոչնչացվել է 2876 պայթյունավտանգ առարկա: Ընդհանուր առմամբ՝ ականազերծված է ավելի քան 62 հեկտար տարածք, 21 կմ ճանապարհ, վնասազերծել է ավելի քան 4000 պայթյունավտանգ առարկա:
Պարոն Կոնաշենկովն ասել է, որ ՌԴ ՊՆ զինվորական հոսպիտալի շարժական բրիգադները մասնագիտացված օգնություն են ցուցաբերել 11 բնակչի, այդ թվում՝ մեկ երեխայի․«Ընդհանուր առմամբ, ռուս բժիշկները օգնություն են ցուցաբերել 280 բնակչի, այդ թվում՝ 29 երեխայի: Շարունակվում է զիվորական երկրորդ հոսպիտալի տեղակայումը Մարտակերտում»։
Կարդացեք նաև
ՌԴ ՊՆ ներկայացուցչի խոսքով՝ խաղաղապահների եւ Կարմիր խաչի միջազգային կոմիտեի ուժերով շարունակվում են որոնողական աշխատանքներն ու զոհերի մարմինների փոխանակումը: Նա հիշեցրեց՝ գործում է անհետ կորածների մասին տեղեկություններ հավաքագրելու թեժ գիծը, Ստեփանակերտում՝ քաղաքացիների ընդունելության կետը․«Ավելի քան 286 զանգ է գրանցվել, եւ հանդիպում՝ 1947 քաղաքացիների հետ»։
Պատրաստեց՝ Նելլի ԲԱԲԱՅԱՆԸ
