«Համոզված եմ, որ այս խաղը վաղուց խաղացված խաղ է եղել՝ դեռ պատերազմը չսկսված: Գործընթացների շղթան, ներառյալ Շուշին, նախօրոք որոշված է եղել: Նախապես որոշված է եղել նաեւ ռուսական զորքերի ներկայությունն Արցախում: Իմ խոսքը հայամետ է, բայց ցավոք սրտի այսօր այն հակառուսական պետք է հնչի»,-ներքաղաքական իրավիճակից ելքերի ճանապարհային քարտեզի ներկայացման նպատակով «Լուսավոր Հայաստանի» նախաձեռնած խորհրդարանական լսումների ժամանակ այսօր հայտարարեց ազգային պարարվեստի գործիչ, ազատամարտիկ Գագիկ Գինոսյանը:
«Եկեք մտածենք, թե ինչպես եղածին ուրիշ ընթացք տանք: Դրա համար Նիկոլ Փաշինյանը պետք է հեռանա, բայց նախորդ ուժերն էլ չպետք է գան, այլապես շարունակելու են իրենց գիծը: Որեւէ մեկը ստրկամիտ մտածելակերպից դեռ դուրս չի եկել…Բանակը չէր կարող լինել մարտունակ, որովհետեւ չուներ ազգային գաղափարախոսություն: Քանի դեռ գեներալիտետը ռուսական ակադեմիա է անցել եւ ռուսական դաստիարակություն ստացել, մնալու է ռուսիզմ ունեցող բանակ…եթե «Իմ քայլը» խմբակցությունը մեծամասնություն է մնալու, վարչապետի փոփոխությունը հարց չի լուծելու, եւ փոփոխությունները կկասեցվեն…այսինքն, իրենք վարչապետ չեն ունենա, բայց թույլ չեն տա, որ ԱԺ-ն որոշումներ կայացնի»,-նշեց Գագիկ Գինոսյանը:
Լուիզա ՍՈՒՔԻԱՍՅԱՆ
