«Հայաստանի բոլոր քաղաքական ուժերն են արձանագրել, որ նոյեմբերի 9-ի եռակողմ հայտարարությունն այլեւս իրողություն է եւ իրականացվում է, բայց իրականացվում է՝ անորոշություններն ի նպաստ ադրբեջանական կողմի: Այս մասով մենք պետք է բանակցություններ վարենք: Իսկ փաստաթուղթը չեղարկելը հղի է նոր պատերազմով: Դուք պատրա՞ստ եք նոր պատերազմի»,-ներքաղաքական իրավիճակից ելքերի ճանապարհային քարտեզի ներկայացման նպատակով «Լուսավոր Հայաստանի» նախաձեռնած խորհրդարանական լսումների ժամանակ այսօր անդրադառնալով նոյեմբերի 9-ի եռակողմ հայտարարությանը՝ ասաց ԼՀ ղեկավար Էդմոն Մարուքյանը:
«Փաստաթղթի անգամ մասնակի չեղարկումը պատերազմ է ենթադրում: Կապանում եւ Գորիսում ժողովուրդը մոբիլիզացվել է եւ կանգնած է սահմանին, կանոնավոր բանակ չկա, իսկ մենք խոսում ենք մի բանի մասին, որը կարող է նոր պատերազմ բերել: Ես կարծում եմ՝ չի կարելի այդ ճանապարհով գնալ: Կարելի է այդ փաստաթուղթը գոնե շատ առումներով ի շահ մեզ կիրառել՝ բանակցություններով: Բայց այն չեղարկել չի կարելի, դա մեր մոտեցումն է: Գուցե մեկ ուրիշն այդպես չի կարծում»,-հավելեց Մարուքյանը:
Լուիզա ՍՈՒՔԻԱՍՅԱՆ
