Պատերազմի, այնուհետեւ՝ հետպատերազմյան շոկի պատճառով «Նաեւ հացիվ» շարքը չէր թարմացվել երկու ամսից ավելի: Սակայն, ի վերջո, որոշեցինք վերականգնել այն, ու կսկսենք Արցախի խոհանոցին հատուկ մի ուտեստով, որը կոչվում է «Կորկոտ» կամ «Կուրկուտ»:
Կորկոտ կամ կուրկուտ են անվանում նաեւ թեփահան արված, ծեծած ցորենը, այլ կերպ ասած՝ «սպասի ձավարը», որով էլ պատրաստվում է այս ուտեստը: Շատ հագեցնող, իսկական ձմեռային ճաշ է, որը պատրաստել են խաշի նման՝ ողջ գիշեր եփվել է թոնրի մեջ, առավոտյան հավաքվել են մեծ ընկերախմբով, կերել են՝ թթվով, թթի կամ հոնի օղիով եւ անցել իրենց գործերին: Կորկոտ են պատրաստում նաեւ հարսանիքների ժամանակ կամ հարսանիքներին նախորդող գիշերը, երբ հարկավոր էր առավոտյան կուշտ ուտել, որպեսզի հարսանեկան երկար ծեսի ընթացքում քաղցի զգացողությունը չխանգարեր:
Անհրաժեշտ մթերքները
Կորկոտ (ձավար)- 500 գրամ
Կարդացեք նաև
Խոզի միս-800 գրամ
Գլուխ սոխ-2 հատ
Բուսական յուղ- կես բաժակ
Աղ, կարմիր պղպեղ- ըստ ճաշակի
Պատրաստման եղանակը
Խոզի միսը (կարելի է պատրաստել նաեւ ոչխարի, տավարի կամ սագի մսով, բայց Արցախում առավել ընդունված է հենց խոզի միսը) նախապես կտրատել, համեմել աղով եւ կարմիր պղպեղով:
Կորկոտը լավ լվանալ եւ թրջել առնվազն 4-5 ժամով:
Սոխը մաքրել, կտրատել շերտերով եւ տապակել բուսական յուղի մեջ:
Ծանր, ցանկալի է չուգունե կաթսայի հատակին շարեք մի շերտ միս, ընտրեք ամենայուղոտ եւ ոսկորոտ կտորները: Վրայից լցրեքլ մի շերտ կորկոտ, ապա՝ նորից մի շերտ միս, կրկին՝ կորկոտ, վերջում էլի միս, վրայից՝ տապակած սոխը: Այս ամենի վրա ձեր ճաշակով աղ արեք, ապա լցրեք սառը ջուր՝ այնքան, որ ամբողջությամբ ծածկի մթերքները, երկու մատ էլ ավելի: Ծածկեք կափարիչով:
Դրեք 200 աստիճան տաքացրած ջեռոցը: Մոտ 3,5-4 ժամ եփվելուց հետո անջատեք ջեռոցը եւ թողեք եւս մեկ ժամ, որից հետո կարող եք մատուցել: Ցանկալի է մատուցել թթվով կամ բանջարեղենային աղցանով:
Իսկապես շատ համեղ եւ հագեցնող ուտեստ է:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
