«Փաստինֆո» – «Որ օրը ՀՀ ներքաղաքական հարցերով կսկսեն զբաղվել արտաքին ուժերը, իմացեք, որ մենք այդ օրը պետություն չունենք»։ «Փաստինֆո»-ի եթերում ասել է «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը՝ անդրադառնալով այս օրերին Հայաստանին վերաբերող հարցերի լուծմանը Ռուսաստանի դերակատարության վերաբերյալ հարցին։ Ա. Վանեցյանն ընդգծել է՝ ՀՀ-ն ինքնիշխան պետություն է և ներքին հարցերը պետք է լուծեն բացառապես ՀՀ քաղաքացին, ՀՀ -ում գործող քաղաքական և հասարակական շրջանակները։
Գործիչն արձանագրել է, որ ՌԴ-ն մեր ռազմավարական գործընկերն է եւ պետք է ունենանք փայլուն հարաբերություններ։
«Ոչ թե փաշինյանական փայլուն, այլ իրական փայլուն հարաբերություններ»,- շեշտել է Վանեցյանը։
«Հայրենիք» կուսակցության նախագահը հիշեցրել է, որ 2018 թվականի հեղափոխության ընթացքում ՌԴ-ն մշտապես հանդես է եկել լոյալ դիրքերից։ Կային նաև որոշակի զարգացումներ, որ վկայում էին, թե ՌԴ իշխանությունները պաշտպանում են ոչ թե Փաշինյանի , այլ առաջին փոխվարչապետ Կարեն Կարապետյանի թեկնածությունը։
Կարդացեք նաև
«Եթե կհիշեք, Նիկոլ Փաշինյանը և նրա թիմը, ով այսօր ոգևորված մեջբերում է ՌԴ նախագահի խոսքերը՝ ասելով, որ ՌԴ նախագահը աջակցություն հայտնեց իրենց, 2018 թվականի ապրիլ-մայիս ամիսներին նրանք նույն կազմով հստակ գնահատական էին տալիս, որ ՀՀ ներքին գործերին ՌԴ-ն խառնվելու որևէ իրավունք չունի։ Էդ ի՞նչ փոխվեց 2,5 տարվա ընթացքում, որ նրանք շուռ եկան և սկսեցին խոսել հակառակի մասին»։
Արթուր Վանեցյանը մեկ անգամ էլ հիշեցրեց, որ ՌԴ-ի և անձամբ նախագահի անմիջական մասնակցության շնորհիվ հնարավոր եղավ կանգնեցնել պատերազմը, որը Նիկոլ Փաշինյանի թեթև ձեռքով սկսվեց։
«Չգիտեմ պայմանավորվածության, թե անխելքության արդյունքում փաթաթվեց մեզ վրա։ Չեմ կարծում, որ ՌԴ նախագահը և քաղաքական ղեկավարությունը առիթ են տվել՝ կարծելու, որ խառնվում են այս կամ այն երկրի ներքին քաղաքական հարցերին»,- ասաց Արթուր Վանեցյանը։
