Նոյեմբերի 9-ին հայտարարության ստորագրումից անմիջապես հետո հասարակության ավելի քիչ տոկոս է անհրաժեշտ համարել ՀՀ վարչապետ Նիկոլ Փաշինյանի հրաժարականը, քան հիմա: «GALLUP International association»-ի Հայաստանում լիիրավ անդամ Էմ Փի ՋԻ ՍՊԸ –ի կողմից ՀՀ-ում նոյեմբերի 25-ից դեկտեմբերի 2-ն իրականացված հետազոտության արդյունքներով՝ նոյեմբերի 13-ին հարցման մասնակիցների 35,2% կարծել է, որ Նիկոլ Փաշինյանը պետք է հրաժարական տա, նոյեմբերի 18-ին՝ 42,1%-ը, նոյեմբերի 25-ից դեկտեմբերի 2-ը՝ 45,3%-ը:
Նշենք, որ հարցումն իրականացվել է 1002 անձի շրջանում հեռախոսային հարցումների միջոցով: Հետազոտության ընտրանքային սխալը ±3% է:
Հարցման մասնակիցների մեծամասնությունը՝ 56,3%-ը ծանոթ չէ Նիկոլ Փաշինյանի հրապարակած ճգնաժամից դուրս գալու 6 ամսվա ճանապարհային քարտեզին, այդ քարտեզին ծանոթ է 41,5 %-ը:
Հարցման մասնակիցների 28,8%-ի համոզմամբ՝ այս պահին ՀՀ-ում միանշանակ կա արտահերթ խորհրդարանական ընտրությունների անհրաժեշտություն: 27,2%-ը կարծում է, որ միանշանակ այդ անհրաժեշտությունը չկա:
Կարդացեք նաև
Շատ մեծ չէ տոկոսային տարբերությունը կիսանախագահական կառավարման համակարգին վերադառնալու անհրաժեշտություն տեսնողների և խորհրդարանական համակարգը պահպանելու ցանկություն հայտնողների միջև: Հարցման մասնակիցների 36,8%-ը կարծում է, որ պետք է պահպանել կառավարման խորհրդարանական համակարգը, 32,6%-ի համոզմամբ՝ պետք է վերադառնալ կիսանախագահական համակարգին:
Հասարակության միայն 15,4 տոկոսն է համարում, որ ՀՀ-ն հիմա ավելի ապահով է արտաքին հարձակումից, քան
նախքան Արցախյան 44 օրվա պատերազմը: Հարցման մասնակիցների 38,2%-ի կարծիքով՝ ՀՀ-ն ընդհանրապես ապահով չէ:
Հարցման մասնակիցների 86,5%-ի համոզմամբ՝ ՀՀ անվտանգությանը սպառնում է Թուրքիան, 70,9%-ի կարծիքով Ադրբեջանը: Այս առումով երրորդ տեղում է Ռուսաստանը. 11,7 %-ի կարծիքով Ռուսաստանը սպառնում է ՀՀ անվտանգությանը: Իսրայելը հաջորդում է ՌԴ-ին:
Տաթև ՀԱՐՈՒԹՅՈՒՆՅԱՆ
