ԵԱՀԿ Մինսկի խմբի համանախագահ երկրների պատվիրակությունների ղեկավարները՝ Ռուսաստանի արտգործնախարար Սերգեյ Լավրովը, ԱՄՆ պետքարտուղար Ստեֆան Բիգունը և Ֆրանսիայի եվրոպական և արտաքին գործերի նախարար Ժան-Իվ Լը Դղիանը ողջունել են Լեռնային Ղարաբաղում ռազմական գործողությունների դադարեցումը՝ համաձայն Ադրբեջանի, Հայաստանի և Ռուսաստանի ղեկավարների՝ նոյեմբերի 9-ին ստորագրած համաձայնագրի: Այս մասին ասվում է համանախագահ երկրների պատվիրակությունների ղեկավարների տարածած համատեղ հայտարարության մեջ:
ԵԱՀԿ ՄԽ համանախագահ երկրները կոչ են անում Հայաստանին և Ադրբեջանին շարունակել լիարժեք կատարել նոյեմբերի 9-ի հայտարարությամբ ստանձնած պարտավորությունները Լեռնային Ղարաբաղում և հարակից շրջաններում, ինչպես նաև նախորդ հրադադարով ստանձնած հանձնառությունները: Համանախագահ երկրներն ընդգծում են Հայաստանի և Ադրբեջանի միջև համաձայնագրում Ռուսաստանի ձեռնարկած միջոցառումների կարևորությունը ռազմական գործողությունները չվերսկսելու հարցում երաշխավորելու գործում: Նրանք նաև կոչ են անում անհապաղ և լիարժեք կերպով հետ քաշել տարածաշրջանից բոլոր օտարերկրյա վարձկաններին և կոչ անում բոլոր կողմերին նպաստել այդ գործին:
Համանախագահ երկրները հիշեցնում են Հայաստանին և Ադրբեջանին միջազգային մարդասիրական իրավունքի պահանջներին համապատասխանելու իրենց պարտավորությունների, մասնավորապես, գերիների փոխանակման և զոհվածների աճյունները վերադարձնելու հարցում: Նրանք ընդգծում են Լեռնային Ղարաբաղի հակամարտության, այդ թվում վերջին ռազմական գործողությունների հետևանքով տեղահանված մարդկանց կամավոր, անվտանգ, արժանապատիվ և կայուն վերադարձի համար պայմանների երաշխավորման կարևորությունը: Նրանք նաև կարևորում են Լեռնային Ղարաբաղում և դրա շուրջ կրոնական և պատմական ժառանգության պաշտպանության կարևորությունը: Համանախագահ երկրները կոչ են անում Ադրբեջանին և Հայաստանին լիարժեք համագործակցել համապատասխան միջազգային կառույցների հետ՝ իրականացնելու այդ տարածքներում իրենց պարտավորությունները և ապահովելու մարդասիրական հասանելիություն, ասվում է հայտարարության մեջ:
Համանախագահ երկրները դիմում են միջազգային կառույցներին, այդ թվում ԿԽՄԿ-ին ՄԱԿ-ի ինստիտուտներին և այլ համապատասխան կառույցների, այդ թվում ԵԱՀԿ ՄԽ առանձին երկրներին՝ որոշակի քայլեր ձեռնարկել՝ բարելավելու Լեռնային Ղարաբաղում և հարակից շրջաններում համակարգված կերպով մարդասիրական իրավիճակի բարելավմանը: Համանախագահները նաև վերահաստատում են իրենց ամուր աջակցությունը ԵԱՀԿ գործող նախագահի անձնական ներկայացուցչի և նրա թիմի շարունակական աշխատանքին:
Կարդացեք նաև
Համանախագահ երկրները կոչ են անում Հայաստանին և Ադրբեջանին օգտվել ներկա հրադադարից՝ բանակցելու հարատև և կայուն խաղաղության համար՝ ԵԱՀԿ հովանու ներքո: Այդ համատեքստում համանախագահ երկրները կողմերին կոչ են անում առաջին իսկ հնարավորության դեպքում ընդունել համանախագահներին և սկսել էական բանակցություններ՝ լուծելու ծառացած բոլոր հարցերը՝ ըստ համաձայնեցված ժամանակացույցի:
ԵԱՀԿ Մինսկի խմբի համանախագահ երկրները վերահաստատում են իրենց ամուր հավատարմությունը վեճերը լուծելու համար ուժի սպառնալիքի չկիրառմանը: Նրանք վերահաստատում են իրենց հետևողական և միասնական դիրքորոշումը՝ ի շահ հակամարտության բոլոր մնացած էական հարցերի բանակցված, համապարփակ և կայուն լուծման՝ համաձայն այն հիմնարար սկզբունքների և տարրերի, որոնք լավ հայտնի են և՛ Հայաստանին, և՛ Ադրբեջանին: Համանախագահները լիարժեք հավատարիմ են մնում իրենց խնդիրների կատարմանը՝ համաձայն տարածաշրջանում խաղաղություն, կայունություն և բարգավաճում խթանելու իրենց երկարատև ջանքերի:
Պատրաստեց՝ Վիկտորյա ԱՆԴՐԵԱՍՅԱՆԸ
