Միջազգային իրավունքի փորձագետ Արա Ղազարյանը կարծում է, որ եթե Ադրբեջանն իսկապես նախաձեռնի հայկական կողմից փոխհատուցում ստանալու գործընթաց, ապա այն կտեղավորվի ոչ թե իրավական գործընթացում, այլ խաղաղության ենթադրյալ պայմանագրում: «Բայց քանի որ ստատուս քվոն վերացավ, կողմերը եկել են այնպիսի դաշտ, որը հավասարապես կարգավորվող է: Այստեղ երկուսն էլ հավասար հնարավորություններ ունեն, եւ Հայաստանն էլ իր փոխհատուցման պահանջը կարող է ներկայացնել: Կա միջազգային փորձ, երբ որոշվել է, որ երկու կողմերն էլ ավելի լավ է՝ հրաժարվեն այդ պահանջից»,-«Հոդված 3» մամուլի ակումբի առցանց քննարկման ժամանակ այսօր հայտարարեց նա:
Իրավական գործընթացի առնչությամբ էլ Արա Ղազարյանը համոզմունք հայտնեց, որ Ադրբեջանը փոխհատուցում ստանալու տեսականորեն քիչ հնարավորություններ ունի. «Գործընթացները տեսականորեն տանելու են դեպի խաղաղության պայմանագիր, ոչ թե կրակի դադարեցման այս համաձայնությունը, որը չունի միջազգային պայմանագրին բնորոշ մանրամասներ»:
Հիշեցնենք, որ Ադրբեջանը հայտարարել է, թե 50 միլիարդ դոլարի փոխհատուցում է պահանջելու հայկական կողմից:
Կարդացեք նաև
Լուիզա ՍՈՒՔԻԱՍՅԱՆ
