Այսօր կառավարության նիստում Արցախում պատերազմական գործողություններից տուժած անձանց փոխհատուցելու որոշումներ ընդունվեցին։ Նիստի ավարտին վարչապետ Նիկոլ Փաշինյանն ասաց, որ այսօրվա ընդունված որոշումները տեղավորվում էին նոյեմբերի 18-ին իր հրապարակած ճանապարհային քարտեզի մեջ եւ այս ուղղությամբ աշխատանքները պետք է շարունակեն։
Վարչապետը վստահեցրեց՝ պատրաստվում է կառավարության որոշման նախագիծ, որով պատերազմին մասնակցած ուսանողների եւ պատերազմին մասնակցած անձանց ուսանող զավակների 2020 թվականի երկրորդ կիսամյակի ուսման վարձերը կփոխհատուցվեն։ Նա, դիմելով կրթության, գիտության, մշակույթի եւ սպորտի նախարար Վահրամ Դումանյանին, ասաց ․«Հույս ունեմ, որ կառավարության հաջորդ նիստում արդեն այդ որոշումը կընդունենք, բայց այս ընթացքում ուսման վարձի հետ կապված որեւէ խնդիր բուհերում պետք է չառաջանա, մինչեւ դե յուրե այդ որոշումը կկայացնենք եւ գումարները կփոխանցենք»։
Նելլի ԲԱԲԱՅԱՆ
