Արցախում պատերազմական գործողությունների հետեւանքով Արցախի Հանրապետության վերահսկողությունից դուրս մնացած համայնքներում հաշվառված չափահաս քաղաքացիներին ժամանակավոր հյուրընկալողների ծախսերը կփոխհատուցվեն։ Այսօր կառավարության նիստում հաստատվեց վեցամսյա սոցիալական աջակցության միջոցառումը։
Աշխատանքի եւ սոցիալական հարցերի նախարար Մեսրոպ Առաքելյանի ներկայացմամբ՝ Արցախի շատ քաղաքացիներ այսօր բնակվում են Հայաստանում, քանի որ նրանց բնակավայրերը չեն գտնվում Արցախի Հանրապետության վերահսկողության տակ եւ այդ քաղաքացիների զգալի հատվածն իրենց կեցությունն ապահովում են մասնավոր տներում՝ ՀՀ քաղաքացիների հյուրընկալության արդյունքում։
Միջոցառմամբ նախատեսվում է ֆինանսական աջակցություն տրամադրել այն քաղաքացիներին, ովքեր իրենց բնակարանները կամ տները տրամադրում են արցախցիներին։ Նախարարն ասաց, որ յուրաքանչյուր չափահաս անձի համար Հայաստանում 30 հազար դրամի չափով փոխհատուցվող գումար է նախատեսվում, իսկ Արցախի Հանրապետությունում, եթե կտան հյուրընկալող կացարան՝ 45 հազար դրամ։ Դիմելու համար անհրաժեշտ է, որպեսզի կացարան տրամադրող քաղաքացիները դիմեն էլեկտրոնային եղանակով՝ կցելով այն քաղաքացիների տվյալները, որոնց հյուրընկալում են։ Այս գումարները չեն համարվելու որպես վարձակալության գումար, անհատույց տրամադրվող ֆինանսական աջակցություն են եւ ըստ Հարկային օրենսգրքի հարկման ենթակա չեն։
Գումարը տրամադրվելու է յուրաքանչյուր ամիս։
Կարդացեք նաև
Նելլի ԲԱԲԱՅԱՆ
