Լեռնային Ղարաբաղում ռուսական ռազմաբազայի ստեղծումը կծառայեր երկարաժամկետ հեռանկարում տեղում անվտանգության և կայունության ամրապնդմանը: Այս մասին «ՌԻԱ Նովոստի»-ի հետ զրույցում ասել է Արցախի նախագահի խորհրդական Դավիթ Բաբայանը:
«Որպես փորձագետ, այս երկրի քաղաքացի և քաղաքական գործիչ՝ ես կարծում եմ, որ այստեղ ՌԴ բազա ունենալը շատ լավ կլիներ: Ինքներդ դատեք: Ռուսաստանն ունի բավականին հզոր աշխարհաքաղաքական ներուժ: Բայց ի՞նչ, եթե Թուրքիան սկսի Ադրբեջանին դրդել ագրեսիայի: Իսկ եթե զինյալները դո՞ւրս գան Թուրքիայի ենթակայության տակից և որոշեն այստեղ ինչ-որ բա՞ն անել: Այդ դեպքում նրանք կարող են հատուկ փորձել հարված հասցնել Ռուսաստանի հեղինակությանը, էլ չասած, որպեսզի մեզ շատ բարդ իրավիճակի մեջ դնեն անվտանգության տեսանկյունից»,- ասել է Բաբայանը:
Այդ նկատառումներից ելնելով, Բաբայանի խոսքով, Ղարաբաղում ռուսական ռազմաբազայի տեղակայումը տեղին քայլ կլիներ:
«Համենայն դեպս, դա զգալիորեն կուժեղացներ այստեղ անվտանգությունն ու կայունությունը, ընդ որում, երկարաժամկետ հեռանկարում»,- ասել է նա:
Կարդացեք նաև
Բաբայանը նաև կարծիք է հայտնել, որ Արցախում Ռուսաստանի խաղաղապահ առաքելության ընդլայնումը նույնպես դրական քայլ կլիներ, այնուամենայնիվ, ռուս խաղաղապահների այսօրվա քանակն անգամ բավարար է՝ Մոսկվայի դերը տարածաշրջանում ամրապնդելու համար: Նրա խոսքով՝ ԼՂ-ում Ռուսաստանի խաղաղապահ առաքելությունը կարելի է դիտարկել երկու հարթություններում՝ զուտ ռազմական և քաղաքական:
«Ռազմական տեսանկյունից, իհարկե, լավ կլիներ, որ խաղաղապահներն ավելի շատ լինեին: Այս հարցն ունի նաև քաղաքական չափում: Այսինքն, եթե այստեղ ներկա լինի թեկուզ և մեկ ռուս խաղաղապահ, դա արդեն կդիտարկվի ռուսական ներկայության նշան: Այդպիսով, հրադադարի ռեժիմի խախտումն արդեն կունենա քաղաքական հետևանքներ»,- ասել է Բաբայանը:
Թե որքանով ռուս խաղաղապահների այսօրվա ներկայությունը բավարար կլինի ռազմական տեսանկյունից, ըստ Բաբայանի, ցույց կտա ժամանակը: Այնուամենայնիվ, ըստ նրա, ոչ պակաս կարևոր է այդ ներկայության քաղաքական բաղադրիչը, քանի որ Ղարաբաղում հրադադարի ռեժիմի ցանկացած խախտումը մարտահրավեր կլինի նաև Ռուսաստանի համար:
«Իսկ դա արդեն կնշանակի իրադարձությունների այլ ընթացք: Սա շատ նման է Հայաստանում ռուսական ռազմաբազայի հետ կապված իրավիճակին: Այդ բազան Թուրքիայի կողմից լայնածավալ ագրեսիայի դեպքում չի կարող մեզ պաշտպանել: Բայց դրա խորհրդանշական ներկայությունն արդեն անհնար է դարձնում Թուրքիայի ագրեսիան, համենայն դեպս, հիմա»,- ասել է Դավիթ Բաբայանը:
Պատրաստեց՝ Վիկտորյա ԱՆԴՐԵԱՍՅԱՆԸ
