«Կանխատեսումներ կան, որ տնտեսական վիճակը վատթարանալու է: Աշխատանքային ռեսուրսի, աշխատակիցների խնդիր կա, նաեւ՝ մոտիվացիայի: Բնակչության մի ստվար զանգված մտածում է երկրում մնալ-չմնալու հարցի շուրջ եւ դրա հետ կապված՝ գործ անել-չանելու մասին»,-ԱԺ-ում այսօր տնտեսական հարցերի հանձնաժողովի եւ փոքր/միջին բիզնեսի ներկայացուցիչների հետ աշխատանքային հանդիպումից հետո լրագրողների հետ զրույցում ասաց «ՓՄՁ համագործակցության ասոցիացիայի» նախագահ Ռուբեն Օսիպյանը՝ վերլուծելով հետպատերազմյան տնտեսական իրավիճակը:
«Այստեղ պետք է սթափ նայենք իրավիճակին: Մեր դիրքորոշումն այն է, որ հիմա անձնավորված մեղավոր փնտրելով՝ ամեն մեկն իր վրայից մեղքը բարդում է ուրիշի վրա: Թերացումներ եղել են բոլոր օղակներում: Նախկինում տարածված կարծիք կար, որ մենք պետք է պետական աջակցությամբ ապահովենք այն բիզնեսին, որը մի կերպ է գոյատեւում: Իմ կարծիքով՝ հիմա պետք է թիրախը փոխվի, եւ մենք պետք է աջակցենք արդյունավետ, գրագետ, շահութաբեր, արտահանմանը միտված բիզնեսին, որպեսզի իրավիճակը շուկայում փոխվի: Այդպիսի բիզնեսները պետք է օրինակ հանդիսանան մյուսների համար: Նախկինում եւ հիմա ՀՀ-ն հնարավորությունների երկիր է: Լիքը բան արված չի, եւ արտասահմանյան հաջողված փորձը պետք է անել ՀՀ-ում»,-համոզմունք հայտնեց Օսիպյանը:
Ռուբեն Օսիպյանի խոսքով՝ եթե նախկինում ոմանց համար աշխատողներին չգրանցելը եւ հարկերից խուսափելն օրինաչափություն էր, հիմա դա պետք է դառնա անընդունելի անգամ կենցաղային մակարդակում. «Եթե աշխատողին հրաժարվում են գրանցել, նա իր քայլերը պետք է ուղղի աշխատանքի տեսչություն»:
Օսիպյանը նաեւ հույս հայտնեց, որ հանձնաժողովի հետ հանդիպումները շարունակական կլինեն. «Սա վեցերորդ հանդիպումն էր, եւ դա շատ վատ էր: Առնվազն 26-րդ հանդիպումը պետք է լիներ: Վերջին 1,5-2 տարում հանդիպումներ չեն եղել՝ գուցե օբյեկտիվ, գուցե սուբյեկտիվ պատճառներով: Համաձայնության եկանք, որ ամեն ամիս հանդիպումներ կունենանք»:
Կարդացեք նաև
Լուիզա ՍՈՒՔԻԱՍՅԱՆ
