«Սյունիքում որեւէ խնդիր չկա՝ սկսած տեղահանվածների սպասարկումից, վերջացրած անվտանգային հարցերից»,- այսօր ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Արմեն Խաչատրյանը:
Հարցին, թե Մեղրիի միջով ճանապարհը բա ի՞նչ է լինելու՝ նա պատասխանեց. «Մեղրիի միջով ճանապարհը լինելու է ՀՀ-ի տարածքը, ուղղակի Հայաստանի Հանրապետությունը թույլատրելու է, որ իր ճանապարհով անցնեն: Հիմա ո՞նց են Լաչինի միջանցքի անվտանգային պայմաններն ապահովում: Եթե ՀՀ-ն պարտավորվել է, որ ճանապարհ պետք է տա Ադրբեջանին՝ Նախիջեւան-Ադրբեջան կապի համար, դա լինելու է ՀՀ տարածքը, ՀՀ-ի ճանապարհը, ուղղակի ՀՀ-ն պարտավորություն է վերցրել, որ թողնելու է անվտանգ ու անխոչընդոտ տրանսպորտային միջոցների շարժ լինի այդ ճանապարհով»: Դիտարկմանը, որ տրանսպորտային միջոցում կարող է լինել զենք, զինամթերք, սա սուվերե՞ն ճանապարհ է լինելու թշնամու համար՝ Արմեն Խաչատրյանը պատասխանեց. «Զենք-զինամթերքի, նարկոտիկի, թմրամիջոցների հետ կապված թե ոնց կարգավորումները կտրվեն, դա կլուծեն խաղաղապահ ուժերը, թե ՀՀ իրավապահ մարմինները, դա հետագայում կերեւա: Դուք այդպիսի ֆանտաստիկ մտքեր մի բան արեք, որ հեսա զենք է լինելու, զինամթերք է լինելու»:
Հարցին՝ այդ ճանապարհը բացառապես թշնամո՞ւնն է լինելու, թե՞ նաեւ մեզ համար է ծառայելու՝ Արմեն Խաչատրյանը պատասխանեց. «Չգիտեմ, չեմ կարող ասել: Սակայն եթե ընդունում ենք, որ դա մեր ճանապարհն է որեւէ մեկը չի կարող խոչընդոտել մեզ: Դա մեր ճանապարհն է լինելու: Տրամաբանական է այն, որ այդ ճանապարհից մենք երբ ուզենք՝ պետք է օգտվենք: Այդ փաստաթղթի մեջ ամեն ինչը չի, որ կարգավորված է: Սա մեր տրամաբանությունն է, որ պետք է օգտվեն նաեւ մեր քաղաքացիները»:
Կարդացեք նաև
Հռիփսիմե ՋԵԲԵՋՅԱՆ
