Aravot.am-ը ԿԳՄՍ նորանշանակ նախարար Վահրամ Դումանյանից փորձեց պարզել` արդյոք իրականությանը համապատասխանո՞ւմ է մամուլում տարածված այն լուրը, որ նախարար նշանակվելուց 3 օր առաջ ինքը պահանջել է վարչապետ Նիկոլ Փաշինյանի եւ կառավարության հրաժարականը: Ըստ news.am-ի, նա հեղինակել եւ նոյեմբերի 20-ին ԵՊՀ գիտխորհրդի անդամներին էր ուղարկել վարչապետի եւ կառավարության հրաժարականի պահանջով ԵՊՀ գիտխորհրդի հայտարարության այլընտրանքային տեքստ, որտեղ անդրադարձ էր կատարել նոյեմբերի 9-ին ստորագրված համաձայնագրի հետևանքով հասարակության շրջանում առաջացած խորը ճգնաժամին եւ լարված մթնոլորտին:
Քանի որ պարոն Դումանյանը նախարար դառնալուց հետո դադարել է հեռախոսազանգերի պատասխանել, հարցը գրավոր փոխանցեցինք նրա նորանշանակ մամուլի քարտուղար Գեղամ Մելիքբեկյանին:
ԿԳՄՍ նախարարի մամուլի քարտուղարը հարցի առնչությամբ հետեւյալը հայտնեց. «Նախարարը որեւէ հայտարարության տեքստ չի գրել, ԵՊՀ կայքում նույնպես նշված է, որ աշխատանքային հանձնաժողովի կազմում չի եղել պարոն Դումանյանը: Նրան առաջարկվել է ընդգրկվել այդ հանձնաժողովի կազմում, բայց ինքը ինքնաբացարկ է հայտնել, չի ընդգրկվել այդ կազմում:
Հաջորդ օրը, երբ պետք է նորից գիտխորհրդի նիստը կայանար եւ այդ տեքստն ընդունեին, մի կարճ ժամանակ առաջ գիտխորհրդի անդամներին վերոնշյալ հանձնաժողովի աշխատանքային խմբի տեքստն ուղարկել են, որպեսզի ծանոթանան: Պարոն Դումանյանը տեքստում ընդամենը կատարել է որոշակի դիտարկումներ, որոնք միտված են եղել հանրության համախմբմանը, սահմանադրական ճանապարհով խնդիրը լուծելուն, այդ կարգի որոշակի խմբագրական փոփոխություններ է կատարել, որպեսզի տեքստը նաեւ հարիր լինի համալսարանին եւ ամբողջական պատկերի գնահատականը լինի:
Կարդացեք նաև
Սակայն այդ տեքստը չի քննարկվել գիտխորհդի նիստում, չի քվեարկվել, եւ պարոն Դումանյանն էլ համալսարանի ընդհանուր առաջարկված հայտարարության տեքստին «դեմ» է քվեարկել: Այնպես որ պարոն Դումանյանը նոր տեքստ չի մշակել, այլ ցանկացել է, որ համալսարանին հարիր տեքստ լինի եւ ամբողջական ճշգրիտ գնահատական տրվի կատարվածին, ճգնաժամն էլ լուծվի սահմանադրական ճանապարհով»:
Գոհար ՀԱԿՈԲՅԱՆ
