«Իմ քայլը» խմբակցության պատգամավոր Ռուստամ Բաքոյանը ֆեյսբուքյան իր էջում գրել է. «Ոչ մի անհատ իր քաղաքական նպատակահարմարություններից ելնելով իրավունք չունի եզդիական համայնքի անունից հայտարարություններ անել և համայնքի անունից պահանջել վարչապետի հրաժարականը:
Ուզում եմ ևս մեկ անգամ շեշտել, որ համայնքը նման պահանջ չի ներկայացրել: Մենք մեր հայ եղբայրների հետ կիսել ենք հաղթանակներ և պատրաստ ենք կիսել նաև պարտություններ:
Այս պահին համայնքի համար էական է ունենալ ուժեղ Հայաստան, ոտքի կանգնած եղբայրներ և քույրեր:
Ինչպես մարտի ամենածանր օրերին մենք առաջնագծում էինք՝ ծառայելով հայրենիքին, այսօր էլ պատրաստ ենք ծառայել հայրենիքին՝ լինի սահմանին, թե ներհայաստանյան կյանքի կայունացման գործում»:
Կարդացեք նաև
Հիշեցնենք, որ ավելի վաղ Politik.am կայքի գլխավոր խմբագիր Բորիս Մուրազիի ֆեյսբուքյան գրառմամբ տեղեկացրել էր.
Եզդիները երբեք անտարբեր չեն եղել մեր ժողովրդի համար ապահովության և զարգացման կենտրոն հանդիսացող Հայաստանի Հանրապետության ճակատագրով։
Այսօր էլ Հայաստանը ճակատագրական օրեր է ապրում և այսօր էլ անհրաժեշտ է, որպեսզի հայաստանասեր եզդին կանգնի պետականության կորստի դեմ և իր հնարավորությունների սահմանում դիմադրի թշնամուն մեր երկիրը հանձնել ցանկացող դավաճանական գաղափարի դեմ։
Ստեղծված իրավիճակը հաշվի առնելով գաղափարակից ընկերներով սկսում ենք Serhildan (ապստամբություն) շարժումը։ Մեր նպատակն է մասնակից դառնալ Հայաստանը պարտության առաջ կանգնեցրած իշխանության հեռացման գործընթացին։
Մեզ կարող են միանալ Հայաստանում ապրող և ՀՀ քաղաքացի հանդիսացող բոլոր եզդիները։ Կապ հաստատեք մեզ հետ և մասնակից դարձեք Հայաստանի փրկությանը։
«Սարհլդան» շարժման նախաձեռնող խումբ
