ՀՀ-ում ԱՄՆ դեսպանատան էջում հաղորդագրություն է հրապարակվել այն մասին, որ դեսպան Լին Թրեյսին ԼՂ հակամարտության ազդեցության ու հրադադարի պայմանավորվածության վերաբերյալ քննարկում է ունեցել քաղաքացիական հասարակության ներկայացուցիչների, Լեռնային Ղարաբաղից տեղահանված անձանց և հումանիտար օգնության ցուցաբերման մեջ ներգրավված հայաստանյան շրջանակների հետ. «Դեսպանն ընդգծել է, որ հակամարտությանը տևական ու կայուն քաղաքական լուծում գտնելու հարցում Միացյալ Նահանգները պատրաստ է շարունակել իր ջանքերը ԵԱՀԿ Մինսկի խմբի ներքո»:
Aravot.am-ի հետ զրույցում հանդիպման մասնակից, «Հելսինկյան ասոցիացիա» իրավապաշտպան հ/կ-ի ղեկավար Նինա Կարապետյանցը մանրամասներ պատմեց. «Հանդիպումը կազմակերպվել էր Հադրութի կանանց եւ երեխաների խնդրանքով: Ինչպես հայտնի է, նրանք բողոքի ցույցեր էին անում դեսպանատների եւ միջազգային կառույցների դիմաց: ԱՄՆ դեսպանի կողմից առաջարկ եղավ ընդունելու նրանց, սակայն քանի որ կանանցից մեկը կորոնավիրուսով էր հիվանդացել, հանդիպումը հետաձգվել էր: Հադրութի կանայք իրենց խնդիրները բարձրաձայնեցին, իրավիճակը, որի միջով անցել են վերջին երեսուն տարում, այս պահի խնդիրները: Որպես առաջնային հարց՝ Հադրութի կանայք բարձրաձայնել են հայ գերիների խնդիրը: Հիմնականում խոսել են իրենք՝ որպես խնդրի առաջնային կրող:
Ես էլ, որպես իրավապաշտպան կառույցի ներկայացուցիչ, ներկայացրել եմ Արցախում եւ ՀՀ-ում մեր փաստահավաք աշխատանքի մի մասը: Նկատի ունենանք, որ դիվանագիտության մեջ կան որոշակի սահմանափակումներ, եւ դեսպանատանը չէին կարող ասել այն ամենը, ինչ մտածում էին: Բայց բավականին բաց զրույց էր: Ներկաները ճիշտ հասկացան իրար, փոխանցվեց այն, ինչ անհրաժեշտ էր: Արձագանքեցին, որ իրենք էլ են անհանգստացած վիճակով եւ գտնում են, որ հումանիտար մեծ խնդիր կա, պատրաստ են աջակցել: Չեն հստակեցրել, թե ինչ ծավալով, բայց փորձելու են իրականացնել հումանիտար աջակցություն: Գերիների խնդիրը, որպես համանախագահող երկիր, փորձելու են բարձրաձայնել:
Թե ինչ լուծումներ կլինեն, բնականաբար, որեւէ մեկը երաշխիքներ չի կարող տալ, որովհետեւ կողմերը շատ են, շահերը՝ ոչ համընկնող: Զրույցը սրա շուրջ էր, որպեսզի փոխանցենք իրավիճակը դեսպանին: Ինչպես ՀՀ-ում Ֆրանսիայի դեսպանը, ԱՄՆ դեսպանը եւս ասաց, որ հանդիպումների, գործակցության համար իրենց դռները բաց են հանդիպման մասնակիցների առաջ: Ենթադրում եմ, որ մենք էլի կհանդիպենք դեսպանի հետ՝ արդեն քաղհասարակության ներկայացուցիչների մասնակցությամբ:
Կարդացեք նաև
Տեղեկացրի, որ շատ ակտիվ եւ ոչ տեսանելի աշխատանք ենք իրականացնում հատկապես գերիների հարցով: Գուցե առանձին հանդիպենք եւս մեկ անգամ՝ հասկանալու համար, թե այս խնդրի առնչությամբ ինչ հնարավոր տարբերակներ կարող են գործի դրվել»:
Լուիզա ՍՈՒՔԻԱՍՅԱՆ
