«Իրենց իրավունքներն իրացնող մարդկանց մայթից գողանում և տեղափոխում են ոստիկանական բաժանմունքներ»,- հայտարարեց Հայ հեղափոխական դաշնակցության անդամ, պատմաբան Բագրատ Եսայանը:
Ինչպես արդեն տեղեկացրել ենք «Նիկոլ, դավաճան» կոչերով քաղաքացիները նախ փորձեցին փակել Մաշտոցի պողոտան, ոստիկանները նրանց նկատմամբ անհամաչափ ուժ կիրառեցին, բերման ենթարկեցին: Նրանց, այնուամենայնիվ, հաջողվեց մի քանի անգամ փակել պողոտան, դեպի Մաշտոցի պողոտա տանող ճանապարհահատվածը: Հետո երթով շարժվեցին դեպի Աբովյան փողոց և այնտեղ ավարտեցին անհնազանդության գործողությունները:
Ոստիկանները բիրտ ուժ էին կիրառում քաղաքացիների նկատմամբ, անգամ մի քանի հոգով փորձում էին բերման ենթարկել մի քաղաքացու, նա շնչահեղձ էր լինում, մեկ այլ դեպքում բիրտ ուժ կիրառելով հեռացնում էին ոտքից վիրավոր մի երիտասարդի:
Բագրատ Եսայանը բանդիտական որակեց ոստիկանության գործողությունները ու ասաց, որ անձամբ է տեսել թե ինչպես են բերման ենթարկում 7-8 քաղաքացիների: Նա նշեց. «Բանդիտական գործողությունները, որ այս համազգեստը հագած մարդիկ որդեգրել են, մի դավաճան Նիկոլին պաշտպանելու համար է: Ոստիկանի համազգեստով բանդիտները մարդկանց հատ-հատ գողանում են և բերման ենթարկում ոստիկանության բաժիններ»:
Կարդացեք նաև
Նշենք, որ քաղաքացիները նախապես տեղեկացրել էին երթ անցկացնելու մասին, սակայն ոստիկանները նրանց թույլ չէին տալիս՝ բերման ենթարկելով: Իրավապաշտպանների գնահատմամբ՝ բերման է ենթարկվել շուրջ 30 քաղաքացի:
Տաթև ՀԱՐՈՒԹՅՈՒՆՅԱՆ
