«Այս իշխանությունն ու այս ԱԺ-ի հիմնական մասը պատրաստ չէ որեւէ քննարկման կամ հարցազրույցի: Իրենց այդ ամենը տրվել է օդից եւ իրենք հիմա դա վայելում են»,-կառավարության դիմաց լրագրողների հետ զրույցում այսօր ասաց «5-րդ ալիք» հեռուստաընկերության գործադիր տնօրեն Հարություն Հարությունյանը՝ անդրադառնալով այն հանգամանքին, որ ռազմական դրության ժամանակահատվածում իշխանական պատգամավորները հրաժարվել են իրենց եթերում հարցազրույցներ տալ:
Ինչ վերաբերում է վերջերս ԱԺ-ում տեղի ունեցած միջադեպին, երբ «Իմ քայլի» պատգամավոր Քրիստինե Պողոսյանը «5-րդ ալիք»-ի լրագրող Կարինե Մանգասարյանին ասել է՝ «պատերազմն ավարտվի՝ ձեր հալը կտեսնեք», Հարություն Հարությունյանը տեղեկացրեց. «Երկու գործ կա: Դիմեցինք դատախազություն, որը մակագրել է ՀՔԾ-ին: Մյուս գործը վարչական դատարանում է, որտեղ պահանջում ենք 840 000 դրամի փոխհատուցում, որը փոխանցվելու է Զինծառայողների ապահովագրության հիմնադրամին: Ինչու այդքան, որովհետեւ հաշվի ենք առել պատգամավորի մեկ ամսվա աշխատավարձն ու պարգեւավճարը: Սպասում ենք դատական գործընթացին»:
Հիշեցնենք, որ հացադուլին զուգահեռ՝ կառավարության դիմաց բողոքի ցույց են անում ժամկետային զինծառայողների ծնողները:
Կարդացեք նաև
Հարություն Հարությունյանն այս առիթով հայտարարեց, որ վարչապետի եւ ծնողների հետ հանդիպումները ԶԼՄ-ների համար փակ են եղել. «Ծնողներին ստորաբար խաբել են՝ ասելով, որ եթե ԶԼՄ-ները մասնակցեն, ձեր երեխաների համար վատ կլինի մյուս կողմում: Սա մանիպուլատիվ, միտումնավոր ասված խոսք է, որպեսզի ծնողներին տրամադրեն ԶԼՄ-ների դեմ: Աբսուրդ է, երբ ինքը հանդիպում է զոհված կամ անհետ կորած զինվորների ծնողների հետ, եւ չկա լրատվամիջոց: Խաբում են այնպես, ինչպես խաբել են երկու եւ ավել տարի: Նրանք առանց խաբելու չեն կարող իշխել: Մեզ սուտ են պարտադրել պատերազմի օրերին»:
Լուիզա ՍՈՒՔԻԱՍՅԱՆ
