Կառավարության դիմաց այսօր բողոքի ցույց են անում Արցախում ժամկետային զինծառայողներ ունեցող ծնողները՝ որդիների ծառայությունը ՀՀ-ում շարունակելու պահանջով:
Ծնողներից Լուսինե Հարոյանը լրագրողների հետ զրույցում ներկայացրեց վարչապետ Նիկոլ Փաշինյանի հետ այս հարցով հանդիպման մանրամասները. «Երեկ հինգ հոգանոց խմբով հանդիպեցինք վարչապետի հետ, հանդիպման արդյունքը մեզ չբավարարեց: Վարչապետը խնդրել էր երկու օր ժամանակ տալ իրեն՝ պատասխանի համար, բայց բանակցող ծնողները դուրս եկան համոզմամբ, որ այն բացասական է լինելու: Դրա համար նորից այսօր հավաքվել ենք: Մենք այլընտրանք չենք տեսնում: Վարչապետը հավաստիացրել էր, որ Բերձորը մնալու է հայկական հսկողության տակ, բայց այսօր հանդիպեցի երկու տեսանյութի այն մասին, որ Բերձորի եւ Աղավնոյի բնակիչները լքում են տները: Եթե տեղեկությունը հստակ է, որ Բերձորը մնում է, ինչո՞ւ են մարդիկ տները լքում: Այսինքն, մարդիկ չեն վստահում որեւէ պաշտոնական տեղեկությանը, մենք չենք հավատում»:
Լուսինե Հարոյանի որդին ի սկզբանե ծառայել է Ջրականում, եւ նույն վայրում ծառայած ժամկետային զինծառայողները, նրա փոխանցմամբ, հիմա Մարտունիում են ծառայում՝ վատ պայմաններում. «Մեր պահանջն է՝ վայրկյան առաջ վերադարձնել մեր զավակներին: Որեւէ պաշտոնական տեղեկատվության չենք վստահում»:
Ժամկետային զինծառայողի պապիկ Ավետիս Մելքումյանն էլ հայտարարեց. «Դժոխքի միջով անցած զինծառայողներին արդեն պետք է զորացրել: Երեխաս հազալով է հետս խոսում: Ծառայել է Ջրականում, երկար ժամանակ տեղեկություն չունեինք: Հետո զանգեց ու ասաց, որ զանգելու համար բարձրանում են սարի գլխին: Ղեկավարությունից պահանջում եմ կամ զորացրել այդ զինվորներին, կամ ծառայությունը դարձնել մեկ տարի»:
Կարդացեք նաև
Ծնողներից մեկն էլ իր հերթին պատմեց Նիկոլ Փաշինյանի հետ հանդիպման մանրամասները. «Ես նրա երեսին ասացի՝ ինչպես Սերժ Սարգսյանին էր ասում, որ իրավիճակին չես տիրապետում, հիմա դուք չեք տիրապետում զինվորների վիճակին: Ձեր աշխատողները ձեզ սխալ տեղեկություններ են տալիս: Վարչապետը շատ ունակ է խոսքերը փոխելով եւ պատասխանները լղոզելով՝ իրավիճակը փոխել: Պահանջում ենք ժամկետային զինծառայողներին վերադարձնել ՀՀ տարածքում ծառայությունը շարունակելու: Ասացի, դուրը չեկավ: Զինվորը մոռացված է: Երբ նկարագրեցի, թե զինվորն ինչ վիճակում է, պատասխանը եղավ՝ «երկու տեղանի մահճակալ ես ուզո՞ւմ տանենք»…
Սա պատասխա՞ն է: Ես գտնում եմ, որ նման բառերից հետո մենք էլ վարչապետ չունենք: Հետո զգաց, որ հիմարություն է ասել, ներողություն խնդրեց: Այո, այդ երեխաներն իրավունք ունեն մահճակալի վրա քնելու, նրանց առողջությունը քայքայվում է, քնում են գետնին, դիակների վրա, դիերի շորերն են հագնում»:
Ծնողը նշեց. «Վարչապետը մեզ վստահեցրեց, որ կեցության հարցերը կլուծի: Ասացի, որ չեմ հավատում: Ասաց՝ «ճգնաժամային իրավիճակում ի՞նչ եք ուզում»: Պատասխանեցի, որ եթե քսան հազար զինվորին հնարավոր չէ տեղակայել, թող բերեն ՀՀ զորանոցներ: Վարչապետի պատասխանն ինձ հիասթափեցրեց: Առաջարկեցի, որ եթե իրենք չեն կարողանում զինվորերին բերել, մենք բերենք: Պատասխանեց, որ դա հանցագործություն է… այս, կառավարությունը մեզ հիմա դրդում է հանցագործության: Եթե մեզ չեն պատասխանում, մենք գրավոր հայտարարություն կպատրաստենք եւ կստորագրենք, որ պահանջում ենք ՀՀ բերել զինվորներին: Այլապես մեղքն ընկնում է վարչապետի եւ ՊՆ-ի վրա»:
Ծնողի խոսքով՝ ինքը վարչապետի հետ հանդիպմանը վերջինիս առաջարկել է Արցախում գտնվող ժամկետայինների տեղափոխման հարցը լուծել հիմնադրամի գումարներով. «Նա այլայլվեց եւ ասաց, որ դա զինամթերքի համար է: Առաջարկել եմ, որ այդ գումարներն օգտագործեն վիրավոր զինվորների համար եւ ավելացնեն պայմանագրայինների վճարը, որպեսզի գնան եւ պահեն սահմանը: Դժկամությամբ ընդունեց, բայց չմերժեց: Երեկ խոսեց Աննա Հակոբյանի անձը պաշտպանելով, բայց զինվորի մասին ոչ մի խոսք: Դավիթ Տոնոյան, թողեցիր փախար, ամոթ քեզ: Վարչապետ, ամոթ քեզ: Քարվաճառը չպետք է տային այնքան ժամանակ, մինչեւ ռազմագերիներին չփոխանակեին: Այ անխելքներ, մի՞թե այդքանը չհասկացաք»:
Լուիզա ՍՈՒՔԻԱՍՅԱՆ
