Իրավապաշտպան, փաստաբան Նինա Կարապետյանցն արձանագրում է՝ իսկապես գտնվում ենք ծայրահեղ ծանր և ծայրահեղ անկայուն վիճակում՝ սկսած եղած սահմանների պաշտպանությունից, վերջացրած ինքնիշխանության և անվտանգության բնույթի հարցերով:
«Հոդված 3» ակումբում հրավիրված քննարկման ընթացքում Նինա Կարապետյանցը հայտարարեց. «Բոլորը միակարծիք են, որ այս իշխանությունը պետք է հեռանա: Մի փոքր խումբ կա, որ այլ կարծիք ունի: Բայց ինձ համար սկզբունքային խնդիր է, թե ում և ինչպես է փոխանցվելու իշխանությունը: Պետք է ստեղծել բացառիկ պրոֆեսիոնալների խումբ, որտեղ կլինեն ուղղակի ոլորտի պրոֆեսիոնալներ, որոնց կհանձնարարվի կոնկրետ ոլորտ և նաև կլինի որևէ մեկը, որը համեմատաբար ընդունելի է և որին պիտի փոխանցվի երկրի կառավարումը: Այլընտրանք այս պահին չունենք»:
Նինա Կարապետյանցի համոզմամբ՝ ինչքան երկարեց այս անորոշ վիճակը, ավելի խորացնելու ենք մեր բոլոր խնդիրները: Ըստ նրա՝ Սոթքը թիվ մեկն էր, իսկ թե ինչ է այս իրավիճակին հետևելու, դժվար է պատկերացնել:
Նինա Կարապետյանի համար միանշանակ է՝ իշխանության փոխանցում պետք է տեղի ունենա, բայց նրա համար նաև սկզբունքային խնդիր է, որ հանցավոր ռեժիմը վերադարձի հնարավորություն չունենա: Նրա կարծիքով՝ այս պատերազմում բացի ներկայիս իշխանությունից նաև մեղքի բաժին ունեն նախորդները: Բայց Նիկոլ Փաշինյանի մեղքը հատկապես այն է, որ այս երկուսուկես տարվա մեջ որևէ կերպ չանդրադարձավ, որևէ գնահատական չտվեց, որևէ պատասխանատվության որևէ մեկի չենթարկեց. «Դավաճանություններն էլ են եղել չլյուստրացիայի և չվեթինգի պատճառով: Այնպես որ, այո′, այս իշխանություններն ունեն շատ մեծ մեղքի բաժին և այո′, իրենք պետք է հեռանան, այլընտրանք չունենք, քանի որ հեղափոխություն և պատերազմ ձախողած իշխանությունը պետք է հեռանա: Այժմ մեզ պետք են ոչ ստանդարտ լուծումների և պատասխանատվության գաղափարախոսությունը կրելու պատրաստականություն ունեցող բացառիկ պրոֆեսիոնալներ: Այս կառավարությունն այս կազմով ի վիճակի չէ որևէ լուծում տալ»:
Կարդացեք նաև
Տաթև ՀԱՐՈՒԹՅՈՒՆՅԱՆ
