Ռուսաստանը մշտական կապ է պահպանում Թուրքիայի հետ Լեռնային Ղարաբաղի կարգավորման հարցով: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան այսօր տեղի ունեցած ճեպազրույցում:
«Ինչ վերաբերում է մեր փոխգործակցությանը Թուրքիայի հետ, այն տարվում է տարբեր ուղղություններով, դա և՛ քաղաքական-դիվանագիտական կապեր են, և՛ կապեր մեր զինվորականների միջև: Անկասկած, վեկտորը տրվում է պետությունների ղեկավարների կողմից, որոնք պարբերաբար քննարկում են իրավիճակը տարածաշրջանում»,- ասել է Զախարովան:
Զախարովան նշել է, որ շաբաթվա ընթացքում իրավիճակը Լեռնային Ղարաբաղում շարունակվել է կայունանալ, հրադադարի ռեժիմի խախտման դեպքեր չեն գրանցվել, չի արձանագրվել նաև սադրանք ռուսական խաղաղապահ կոնտինգենտի նկատմամբ:
«Հաջողվում է առանց որևէ լուրջ միջադեպերի ապահովել ընթացիկ տարվա նոյեմբերի 9-ի եռակողմ համաձայնագրի հիմնական դրույթները: Նշված դրական միտումները Ադրբեջանի, Հայաստանի և Ռուսաստանի առաջնորդների կողմից հաստատված ուղու ճշմարտացիության ծանրակշիռ ապացույց են և այս պահին լիարժեք իրականացվում են գործնականում: Նման տրամադրվածություն գերակշռում է նաև մեր այն միջազգային գործընկերների շրջանում, որոնք չեն մտածում աշխարհաքաղաքականության կատեգորիաներով՝ զրո գումարով խաղի տեսանկյունից»,- ասել է Զախարովան:
Կարդացեք նաև
Նրա խոսքով՝ հարցերի ամբողջ շրջանակը, որոնք բխում են նոյեմբերի 9-ի հայտարարությունից, Ռուսաստանի ղեկավարության ուշադրության կենտրոնում է: Զախարովան նաև կոչ է արել Լեռնային Ղարաբաղի հարցում ներգրավված բոլոր կողմերին չքաղաքականացնել տարածաշրջանում մարդասիրական հարցը:
«Կոչ ենք անում բոլոր կողմերին չքաղաքականացնել մարդասիրական հարցը, անհապաղ անցնել աշխատանքի, որը միանգամայն պահանջված է՝ տարածաշրջանում առկա բավականին սուր մարդասիրական իրավիճակի պայմաններում: Դա կարևոր ներդրում կլիներ մշակութային հուշարձանների և կրոնական սրբավայրերի պահպանության, միջկոնֆեսիոնալ, ազգամիջյան, հաշտության և տարածաշրջանում համաձայնության ապահովման տեսանկյունից»,- ասել է նա:
Զախարովան նշել է, որ վերջին օրերին ռուս խաղաղապահները Ղարաբաղում շարունակել են ստեղծել բարենպաստ պայմաններ փախստականների վերադարձի համար, իրականացրել են ականազերծման և անհետ կորած զինծառայողների և զոհերի մարմինների որոնման աշխատանքներ: Նաև գործարկվել է մարդասիրական արձագանքման կենտրոնը, որի գործունեությանը մասնակցում են մի քանի տասնյակ դաշնային նախարարություններ, գերատեսչություններ և գործակալություններ:
Պատրաստեց՝ Վիկտորյա ԱՆԴՐԵԱՍՅԱՆԸ
