«Հոկտեմբերի 19-ին մեր երկրորդ հանդիպմանը մենք շատ ծանր խոսակցություն ենք ունեցել վարչապետի հետ: Ինձ հետ եղել են նաեւ արտախորհրդարանական ուժերի ներկայացուցիչներ եւ ղեկավարներ: Մենք այդ օրը, երբ Հադրութը դեռ չէր ընկել, կամ, մի քանի ժամ հետո պետք է այլեւս իրողություն դառնար, մենք խոսեցինք կապիտուլյացիայի մասին»,-ԱԺ արտահերթ նիստում այսօր ռազմական դրությունը չեղարկելու վերաբերյալ «Լուսավոր Հայաստանի» նախագծի քննարկման ժամանակ հայտարարեց անկուսակցական պատգամավոր Արման Բաբաջանյանը:
«Այսինքն, հարց հնչեց՝ «սա կապիտուլյացիա՞ է, պարոն վարչապետ», եւ վարչապետն առնվազն չհակադարձեց: Եվ մենք գիտեինք արդեն: Իսկ մեր հանդիպմանը հաջորդել էր անվտանգության խորհրդին, որտեղ, կարծում եմ, նույնաբովանդակ խոսակցություն է եղել, եւ ներկաները հաստատապես նույնաբովանդակ խոսակցություն ունեցել են: Այդ օրը վարչապետն ասաց, որ օրվա ընթացքում զանգել է ՌԴ նախագահին, հարցրել՝ «ի՞նչը կարող է կասեցնել պատերազմը», եւ Պուտինն ասել է՝ «Լավրովի պլանը»…եւ մեր հանդիպումից հետո՝ 20:00-ին, պետք է տեղի ունենար Փաշինյանի հեռախոսազրույցը ՌԴ նախագահի հետ, որտեղ Փաշինյանն ուներ որոշում, որ ՀՀ-ն գնում է «Լավրովի պլանի» շուրջ բանակցությունների: Հետո միայն պարզ դարձավ, որ Ադրբեջանն այլեւս չի համաձայնել կանգնեցնել պատերազմը»,-հավելեց Արման Բաբաջանյանը:
Լուիզա ՍՈՒՔԻԱՍՅԱՆ
