ԲՀԿ պատգամավոր Իվետա Տոնոյանն այսօր ԱԺ-ում լրագրողների հետ զրույցում ասաց, որ Գագիկ Ծառուկյանին պատգամավորական անձեռնմխելիությունից զրկելու գործընթացը հիմնազուրկ է ու քաղաքական հետապնդման շարունակությունն է. «Այստեղ գործ ունենք Նիկոլ Փաշինյանի կողմից անձնական հաշվեհարդար տեսնելու հետ՝ Գագիկ Ծառուկյանի նկատմամբ: Մենք առիթ ենք ունեցել համոզվելու, որ Գագիկ Ծառուկյանին մանդատից զրկելը որեւէ բան չի նշանակելու: Այդ իշխանության ներկայացուցիչներն են, որ իրենց կյանքի միակ նպատակ սրբություն համարում են մանդատը: Մենք ընդամենը գործ ունենք վախկոտ, քինախնդիր, փոքրոգի մարդկանց հաշվեհարդար տեսնելու նկրտումների հետ: Իրենց համար կյանքի նպատակ են դարձրել անձնական վրեժխնդրություն լուծելու Գագիկ Ծառուկյանի հետ»:
Նա ասաց, որ Փաշինյանը պետք է օր առաջ հեռանա ու իշխանությունները սարսափած են ընդդիմության այն քայլերից, որոնք այսօր տեղի են ունենում:
Ըստ նրա, իշխանությունները ռազմական դրությունը չեն հանում, որովհետեւ վախենում են, որ ընդդիմությունը անմիջապես հետո՝ 48 ժամվա ընթացքում անվստահություն կհայտնի վարչապետին: Իսկ թե ով է լինելու ընդդիմության առաջարկած վարչապետը՝ Տոնոյանը անուն չհրապարակեց, ասաց՝ ամբիցիաներ կարող են ունենալ շատերը, բայց այդ պաշտոնը պետք է ստանձնի այն մարդը, ով կարող է այդ բեռի տակ մտնել:
Կարդացեք նաև
Հռիփսիմե ՋԵԲԵՋՅԱՆ
