Ազգային ժողովն այսօր արտահերթ նիստ է անում՝ օրակարգում «Լուսավոր Հայաստանի» նախաձեռնած՝ Հայաստանում ռազմական դրությունը չեղարկելու մասին նախագիծը:
Հիշեցնենք, որ ԱԺ գլխադասային հանձնաժողովում երեկ այն ներկայացնելով՝ «Լուսավոր Հայաստանի» պատգամավոր Գեւորգ Գորգիսյանը նշեց, որ ռազմական դրության համար հիմք ծառայած հանգամանքներն արդեն գոյություն չունեն, ուստի այն պետք է չեղարկել:
Մինչդեռ ՊՆ եւ կառավարության ներկայացուցիչներն ասել էին, որ ռազմական դրության չեղարկումն անվտանգային եւ առողջապահական խնդիրներ կառաջացնի:
Այսօր էլ ներկայացնելով նախագիծը՝ Գեւորգ Գորգիսյանը գործընկերներին կոչ արեց կողմ քվեարկել, որպեսզի կառավարության անգործության պատճառով չշարունակվեն այն սահմանափակումները, որոնց կարիքն այլեւս չկա:
Կարդացեք նաև
«Իմ քայլի» պատգամավոր Վահագն Թեւոսյանը նկատեց. «Հավաքներն այսպես թե այնպես տեղի են ունենում, եւ ոստիկանության վրա հավելյալ ծանրաբեռնվածություն կա: Բայց եթե հիմնավորումներ են բերվել, որ ռազմական դրությունը չեղարկելը հիմա ժամանակավրեպ է…Չենք կարո՞ղ թողնել այն հատվածները, որոնք վերաբերում են մոբիլիզացիոն գործընթացներին կամ հումանիտար օգնությանը»:
Գեւորգ Գորգիսյանն արձագանքեց. «Մասնակի չեղարկման տարբերակը նույնպես կարող է ԱԺ-ն նախաձեռնել: Մեր նախագիծը մեկ շաբաթ է՝ շրջանառության մեջ է, բայց ոչ ձեր խմբակցությունը, ոչ էլ կառավարությունը չի առաջարկել մասնակի չեղարկել: Իսկ հավաքները, գիտենք, որ հիմա համարվում են ապօրինի, որովհետեւ արգելված են ռազմական դրության ժամանակ: Հետեւաբար, քաղաքացիներին փորձում ենք իրենց սահմանադրական իրավունքը վերադարձնել»:
Թեւոսյանը շարունակեց՝ եթե կառավարությունը չի նախաձեռնել մասնակի չեղարկում, ուրեմն կարիք չկա: Գորգիսյանը պնդեց՝ իրենք գտնում են, որ ռազմական դրության իրավական ռեժիմն ամբողջությամբ պետք է չեղարկվի, իսկ եթե «Իմ քայլը» գտնում էր, որ մասնակի կարող է չեղարկվել, թող նախաձեռներ:
«Իմ քայլից» Հովհաննես Իգիթյանն էլ նկատեց՝ ռազմական դրությունը մտցվել է՝ հաշվի առնելով ադրբեջանական ագրեսիան. «Հիմա, ըստ ձեզ, ջիհադիստները տարածաշրջանից վերացա՞ն: Կամ, Ադրբեջանը դադարե՞ց լինել ագրեսիվ: Ավելին՝ Թուրքիայի անմիջական մասնակցությունը հստակ է: Կա՞ մի փորձագետ, որի կարծիքը հաշվի կառնեք եւ կորոշեք, որ իրավիճակը պակաս վտանգավոր չէ»:
Գեւորգ Գորգիսյանը պատասխանեց. «Ձեր տրամաբանությամբ՝ 94թ.-ից ի վեր պետք է լինենք ռազմական դրության պայմաններում, որովհետեւ շրջապատված ենք ագրեսիվ հարեւաններով, որոնք միշտ հայտարարել են, որ մինչեւ Երեւան պետք է գրավեն…ամսի 9-ին ստորագրված կապիտուլյացիոն հայտարարությամբ՝ տարածաշրջանում այլեւս անվտանգ է, ռազմական գործողությունների վտանգ չկա, դրա համար տրվել են երաշխիքներ եւ այդ մասին հայտարարել են երկրների ղեկավարները: Եթե կարծում եք, որ վարչապետը ստել է, կամ ՌԴ նախագահին եւ ԱԳ նախարարին չեք վստահում, ինչ ասեմ…»:
Իգիթյանը նշեց. «Ձեր խմբակցությունում կա վստահելի իրավաբան, որի կարծիքը հարգում եմ: Հարցրեք նրան, թե ինչ է նշանակում «կապիտուլյացիա»: Զգուշավոր օգտագործեք այդ գոյություն չունեցող բառը: Ինչ վերաբերում է հարեւանների ագրեսիային, ինձանից լավ գիտեք, որ եղած անվտանգության մոդելը հիմա խաթարվել է եւ փոխվել, եւ մենք պետք է արագ բացը լրացնենք, հասցնենք այն փոխել: Ռազմական դրությունը դրա հնարավորությունը պատշաճ կերպով է տալիս»:
Գորգիսյանը պատասխանեց. «Ձեր ասածը վերաբերում է ԶՈՒ վերաբաշխմանը, որի դեպքում ռազմական դրությունը պարտադիր պայման չէ»:
Լուիզա ՍՈՒՔԻԱՍՅԱՆ
