Գորիսի համայնքի ավագանու անդամ Գարիկ Գեւորգյանը երկու օր առաջ դիմել էր ավագանու իր գործընկերներին, Սյունիքի մարզի բոլոր համայնքների տեղական ինքնակառավարման մարմինների ներկայացուցիչներին՝ միանալու վարչապետ Նիկոլ Փաշինյանի հրաժարականը պահանջելու նախաձեռնությանը, «ոտքի կանգնել եւ փրկել Սյունիքն ու Հայաստանը հետագա վտանգավոր իրադարձություններից»։
«Միեւնույն ժամանակ, կոչով դիմում եմ նաեւ հանրությանը՝ համախմբվելու պետականության պահպանման համար կարեւոր գաղափարների շուրջ՝ կտրականապես մերժելով երկպառակության, անջրպետների խորացման ցանկացած փորձ։ Այս վճռորոշ եւ ճակատագրական պահին հասարակության բոլոր շերտերի, պրոֆեսիոնալ եւ կարող ուժերի, պետական ինստիտուտների, քաղաքական կուսակցությունների ջանքերը պետք է ուղղված լինեն միասնականության վերահաստատմանը՝ հանուն Հայաստանի եւ Արցախի»,–նշել էր ավագանու անդամը իր կոչում։
Aravot.am-ը Գարիկ Գեւորգյանից փորձեց պարզել՝ արձագանքե՞լ է որեւէ մեկը իր կոչին։ «Դեռեւս պաշտոնական ոչ մի բան չկա, խոսում են հետս, հասկանում են, որ թերեւս միակ պահանջն ու ճիշտ քայլը հրաժարականը կլինի, բայց առայժմ ոչ մի կոնկրետ ձեռնարկումներ չկան»,–ասաց Գարիկ Գեւորգյանը։
Ավագանու անդամից նաեւ հետաքրքվեցինք, թե արդյո՞ք կոչի հետ կապված նրան կանչել են որեւէ իրավապահ կառույց։ «Ինչի՞ համար, ի՞նչ եմ արել։ Ես պարզապես կոչ եմ արել, իմ տեսակետը արտահայտել, որը Սահմանադրությամբ է ամրագրված եւ ոչ մի օրենք չեմ խախտել»,–ասաց Գեւորգյանը։
Կարդացեք նաև
Ի դեպ, Գարիկ Գեւորգյանը «Լուսավոր Հայաստան»-ի անդամ է, սակայն վարչապետի հրաժարականի կոչը ԼՀԿ-ի հետ, ըստ Գեւորգյանի՝ կապ չունի։ «Իմ անմիջական նախաձեռնություն է, դեռ սպասում եմ արձագանքների ու հետո պարզ կլինի հետագա քայլերի ընթացքը»,-մեր հեռախոսազրույցում նշեց Գորիսի համայնքի ավագանու անդամ Գարիկ Գեւորգյանը։
Արմեն ԴԱՎԹՅԱՆ
