«Իմ քայլը» խմբակցությունը երեկ փակ նիստ էր հրավիրել, որին շատ կարճ ժամանակով մասնակցել է նաեւ Արցախի նախագահ Արայիկ Հարությունյանը:
Հանդիպումից հետո խմբակցության անդամ Հովհաննես Իգիթյանը լրագրողներին հայտնեց, որ քննարկվել են պատերազմից հետո Արցախում ստեղծված խնդիրները:
Անդրադառնալով գերիների եւ անհետ կորածների խնդրով ձեռնարկվող քայլերին՝ Իգիթյանն ասաց, որ դիվանագիտական բոլոր ճանապարհներով, այդ թվում խորհրդարանական դիվանագիտության ճանապարհներով այդ հարցը պետք է բարձրացվի:
Պատգամավորը հայտնեց նաեւ, որ խմբակցության նիստում ինքը կոնկրետ բարձրացրել է հետեւյալ հարցը՝ որ անհետ կորածների եւ գերիների ծնողները ոչ թե պետք է իրենք գնան տարբեր ատյաններ իրենց երեխայի մասին տեղեկություն իմանալու, այլ տանը կամ որեւէ այլ տեղ նստած օրը 2 կամ 3 անգամ իրենց պետք է ասեն՝ նորություն չկա կամ նորություն կա: Ըստ Իգիթյանի, սա պետք է լինի պետության վերաբերմունքը:
Կարդացեք նաև
«Օգտագործելով Եվրոպայում, միջազգային կառույցներում, Ռուսաստանում իմ կապերը մի քանի հարցեր փորձում ենք բարձրացնել, որովհետեւ անորոշությունները շատ են եւ լուծումները պետք է լինեն ժամ շուտ: Ինձ համար դա ավելի կարեւոր հարց է, քան քաղաքական ցանկացած հարց՝ ով է լինելու նախարար, ով չի լինելու նախարար. դա կարեւոր է, չեմ ասում կարեւոր չէ, բայց կան հրատապ հարցեր, որոնք ցավոք Լեռնային Ղարաբաղի պաշտոնյաների շրջանակներից, հնարավորություններից դուրս են»,- ասաց պատգամավորը:
Ըստ նրա՝ ի վերջո տեղի է ունեցել անարդար մի բան եւ իրենք ու միջազգային գործընկերները պետք է այդ հարցը բարձրացնեն՝ Թուրքիայի մասնակցությունը, ջիհադիստների մասնակցությունը եւ այլն:
Սյուզաննա ՊՈՂՈՍՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում
