Այսօր «Հենարան» ակումբում հրավիրված մամուլի ասուլիսում անդրադառնալով գեներալ Սեյրան Օհանյանին կալանավորելու՝ Բաքվի դատարանի որոշմանը՝ մեդիափորձագետ Տիգրան Քոչարյանն ասաց. «Սեյրան Օհանյանն այն բացառիկ մարդկանցից է, որը հետապնդվում է թե Ադրբեջանի, թե Հայաստանի իշխանությունների կողմից: Իմ կարծիքով այս օրերին նույնիսկ արժեր կարճել ոչ միայն Սեյրան Օհանյանի, այլ բոլոր այն մարդկանց հետապնդումը Հայաստանում, որոնք արցախյան հաղթանակում մեծ ներդրում են ունեցել եւ հիմա սահմանադրական կարգի տապալման գործով են դատվում: Թե չէ, այնպիսի տպավորություն է ստեղծվում, որ Հայաստանի եւ Ադրբեջանի իշխանությունները ոնց որ այս ուղղությամբ էլ են միասին աշխատում»:
«Ուղղակի եւ զավեշտալի եւ ողբալի է, որ մեր պատերազմի հերոսները հետապնդվում են նաեւ Հայաստանում: Այնպիսի տպավորություն կարող է ստեղծվել, թե երկար ժամանակ իրենց հանդեպ ինչ-որ քեն կա եւ ինչ-որ վրեժ է լուծվում բոլոր այն մարդկանցից, ովքեր արցախյան պատերազմներում հաղթանակ են տարել եւ այդ հաղթանակների կերտողներն են: Ինձ համար անհասկանալի էր, օրինակ, Վազգեն Սարգսյանի արձանը Շուշիից չտարհանելը: Եթե գիտեին, որ Շուշին հանձնվելու է, կարող էին սպարապետի արձանը տարհանել, կամ, եթե տեսնում էին, որ չեն հասցնում, դուրս գալուց ուղղակի պայթեցնել: Այնպիսի տպավորություն էր, որ արձանը պետք է մնար Շուշիում եւ պետք է պղծվեր»,- Տիգրան Քոչարյանը:
Աշոտ ՀԱԿՈԲՅԱՆ
