Այսօր Երեւանի ավագանու նիստում «Իմ Քայլը» խմբակցության անդամ Լեւոն Զաքարյանն (լուսանկարում) ասաց՝ «Եթե ժողովուրդը պահանջի, մենք կհեռանանք, ես պատրաստ եմ կրելու իմ բաժին պատասխանատվությունը: Միեւնույն ժամանակ, դատապարտում եմ ԱԺ խոսնակի նկատմամբ բռնությունը, ինչպես նաեւ պետական հաստատություններում անկարգությունները նոյեմբերի 10-ի գիշերը»:
Ավագանու «Իմ քայլը» խմբակցության անդամ Գրիգոր Երիցյանը չբացառեց, որ խմբակցության անդամները կարող են վայր դնել մանդատները, սակայն կոչ արեց այս փուլում նման գործողություններ չանել եւ միավորել ջանքերը, որպեսզի դա նպաստի խնդիրների լուծմանը:
«Բարգավաճ Հայաստան» խմբակցության ղեկավար Միքայել Մանրիկյանը դատապարտելով Նիկոլ Փաշինյանի աջակիցների հարձակումը Ռադիոյի տան վրա 2018 թվականին, ասաց՝ «Դուք ձախողեցիք բոլոր ոլորտները: Հենց դրա հետ է կապված Փաշինյանի եւ ողջ իշխանական ուժի հրաժարականի պահանջը»:
Ի պատասխան, ավագանու նիստը վարող Երեւանի փոխքաղաքապետ Հրաչյա Սարգսյանն ասաց, որ համաձայն չէ պարոն Մանրիկյանի պնդումներին եւ որպես հաջողված օրինակ նշեց կանաչապատման ոլորտը: Փոխքաղաքապետը նաեւ մատնացույց արեց 2021 թվականի դեկտեմբերին մեկնարկող մայրաքաղաքի տրանսպորտային ցանցի համար ավտոբուսների արտադրության մրցույթը:
Կարդացեք նաև
Լուսինե ԲՈՒԴԱՂՅԱՆ
