«Զարմանում եմ ընդդիմության գործունեության վրա: Հիմա էլ Նիկոլ Փաշինյանը օրակարգ է իջեցնում կեղծ հարցադրումներ, որոնց ընդդիմությունը փոխանակ հստակ պատասխանի, զարմանում եմ՝ խուսանավում են»,- «Հայելի» ակումբում հրավիրված մամուլի ասուլիսում այսպիսի կարծիք հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Օրինակ՝ նա նշեց, որ այդ կեղծ հարցադրումներից են՝ եթե նորերը գնան, կգան հները, կամ հնին վերադարձ չկա ու ասաց.
«Ուզում եմ հասկանալ: Այսինքն՝ վերադարձ Արցախյան ազատամարտի հաղթանակին չկա՞, Ռոբերտ Քոչարյանի տնտեսական աճով տասը տարիներին չկա՞, Սերժ Սարգսյան միջազգային ոլորտում ձեռքբերումների՞ն չկա: Այդ քաղաքական ուժերը, եթե ասում են՝ հնին վերադարձ չկա, նրանց մեջ չկա մեկը, որ նոր է: Սա կեղծ օրակարգ է, որը նետել է Նիկոլ Փաշինյանը, և ընդդիմությունն այդ կուտը կերել է»:
Գառնիկ Իսագուլյանը հիշեցրեց՝ Նիկոլ Փաշինյանն ընդդիմության մասին ասում է՝ նրանք պայքարում են իշխանության համար ու արձագանքեց. «Բա եթե իշխանություն չունենք, ո՞նց կարող են իրավիճակ փոխել: Այո, ես պայքարում եմ իշխանության համար, քանի որ իշխանությունը գտնվում է պետական դավաճանների ձեռքում, ու նրանցից պիտի հրաժարվել»:
Տաթև ՀԱՐՈՒԹՅՈՒՆՅԱՆ
