Նիկոլ Փաշինյանի հրաժարականը պահանջող 17 կուսակցությունների այսօրվա հանրահավաքին ներկա էր նաեւ շախմատի համաշխարհային օլիմպիադայի հաղթող, Շախմատի ակադեմիայի հիմնադիր-տնօրեն Սմբատ Լպուտյանը:
Գրոսմայստերին Ազատության հրապարակ բերել էր երկրի վիճակի, այստեղ եւ Արցախում մարդկային կորուստների մտահոգությունը:
Սմբատ Լպուտյանը ելքը տեսնում է միասնության մեջ: «Այսօր բոլորը պետք է լինեն մեկ բռունցք, մտածեն, թե ովքեր կարող են երկիրը դուրս հանել այս ծանր վիճակից: Դա է խնդիրը: Երկիրը վտանգի տակ է»,-Aravot.am-ին ասաց նա:
Կարդացեք նաև
«Մենք բոլորս հասարակություն ենք, բոլորս հայ ենք: Իհարկե, կան տարաձայնություններ: Բնականորեն արդեն կա խիստ անվստահություն հասարակության կողմից ներկա իշխանությանը, որը բերեց այս վիճակին: Բնականորեն հասարակությունը կարող է արդեն չվստահել, որովհետեւ այն, ինչ այսօր ունենք, երեւի 100 տարվա մեջ չենք եղել: Բայց էլի եմ ասում՝ պետք է համախմբվել, միասնական գտնվել, թե ինչպես կարելի է այս վիճակից դուրս գալ: Այս իրավիճակում ներկայիս իշխանությունները պետք է ցանկանային զիջել եւ օգնել՝ ընդգրկելու այդ մարդկանց կամ փորձեին միասնականություն քարոզել: Այսպիսի պարտությունները հենց այնպես չեն լինում: Կան բազմաթիվ սխալներ, որոնք այս վիճակին հասցրին: Պետք է լավ վերլուծել: Եվ հասարակությունը պետք է հասկանա, վերլուծելուց հետո տեսնի իր սխալները, թե որտեղից են գալիս եւ ինչ պետք է անել: Բայց այդ վերլուծությունը պետք է լինի շատ լավը, որպեսզի մյուս անգամ այսպիսի սխալներ չանենք»,-ասաց անվանի գրոսմայստերը:
Աշոտ ՀԱԿՈԲՅԱՆ
