Այսօր Բաղրամյան պողոտայում մի խումբ քաղաքացիներ կազմակերպել էին անհնազանդության ցույցեր: Բերման ենթարկվելու ճանապարհին, ԱԺ նախկին գլխավոր քարտուղար Արա Սաղաթելյանն ասաց, որ Նիկոլ Փաշինյանը պետք է հրաժարական տա, ստեղծվի ժամանակավոր կառավարություն եւ ստեղծվի իրավիճակ, որ մասնագետները կարողանան ինչ-որ հնարավոր է շտկել:
Ցույցի մասնակիցները վանկարկում էին՝ «Նիկոլ, դավաճան»: Վարչապետ Նիկոլ Փաշինյանի հրաժարականի պահանջով Երեւանի տարբեր փողոցներ փակած ցույցերի մասնակիցներից 80 անձ բերման է ենթարկվել ոստիկանություն:
Ցույցին ներկա Արցախի մարդու իրավունքների նախկին պաշտպան Ռուբեն Մելիքյանի խոսքով, ոստիկանությունն այս պահին իրականացնում է բացարձակ ապօրինություն. «Որովհետեւ ռազմական դրության երկարաձգումը բացարձակապես իրավաչափ չէ, որովհետեւ պատերազմը մենք պարտվել ենք, մենք կորցրել ենք Արցախը: Ռազմական դրությունը երկարաձգվում է, որպեսզի այս ցույցերը անթույլատրելի համարվեն: 2018 թվականին թույլատրելի՞ էր, հիմա՝ ո՞չ: 2018-ին ավելի մեծ էր վտանգը մեր պետության համար, քան այսօր, որովհետեւ այսօր մեր դաշնակից Ռուսաստանի Դաշնությունը, փառք Աստծո, պաշտպանում է մեր Արցախի եղբայրների եւ քույրերի անվտանգությունը: Այլեւս Հայաստանի Հանրապետությունը չի երաշխավորը: Ոստիկանության այս գործողություները նորից Շուշի ծախել է, նորից Վազգեն Սարգսյանի արձանը պղծել է: Այս մարդկանց արածը խաղաղ անհնազանդության գործողություն է: Մենք բողոքում ենք այն մարդկանց դեմ, որոնք ոչ միայն Շուշին հանձնեցին, հիմա էլ ուզում են մնան այդ աթոռներին: Ռազմական դրությունը պատերազմի համար էր, Հիմա պատերազմը վերջացել է»:
Կարդացեք նաև
ՀՀԿ գործադիր մարմնի անդամ Գագիկ Մինասյանը նույնպես մասնակցում էր անհնազանդության ցույցին:
«Այն ծանր, մղձավանջային իրավիճակում, որում հայտնվել է պետությունը, պետք է լույս բացվի, այդ լույսը այն մարդիկ են, որոնք չեն հնազանդվում այդ ստորացուցիչ պայմաններին: Նրանք իրենց քայլեր են կատարում՝ դուրս բերելու մեր ժողովրդին այս ստորացուցիչ կարգավիճակից»,-ասաց Գագիկ Մինասյանը: Նրա համոզմամբ, այս իշխանության մնալու յուրաքանչյուր օրը ավելի մեծ խնդիրներ է ստեղծում այս եւ ապագա սերունդների համար. «Մի իրավիճակ է ստեղծվել, որ բոլորը հասկանում են, որ Նիկոլ Փաշինյանը պետք է մնա, մինչեւ դեկտեմբերի 1-ը, որ կարողանա այդ ստորացուցիչ պայմանները մինչեւ վերջ տանել: Բայց դեկտեմբերի 1-ից հետո անտրամաբանական է նրա մնալը եւ որեւէ բանով արդարացված չէ: Այսօր արդեն ժողովուրդը պետք է դուրս գա փողոց, որովհետեւ ակնհայտ է, որ իր կամքով Նիկոլ Փաշինյանը չի լքելու իշխանությունը»:
Բաղրամյան փողոցին զուգահեռ փակվել էր նաեւ Սարյան փողոցը՝ գլխավոր փոստատան հատվածը, որտեղ նույնպես անհնազանդության ցույց էր եւ ոստիկանության մեծ թվով ներկայացուցիչներ: Սարյան փողոցում որոշ քաղաքացիներ հեռացրին փողոցը փակած բեռնատարը, որպեսզի երթեւեկությունը բացվի: Նրանց միացան նաեւ ոստիկանության աշխատակիցները: Բերման ենթարկվեց նաեւ Նարեկ Մալյանը, «Ադեկվադ» միաբանության անդամները:
Լուսինե ԲՈՒԴԱՂՅԱՆ
Լուսանկարում՝ բերման ենթարկված Միհրան Հակոբյանն ու Արմեն Մինասյանը: Լուսանկարը՝ «Ադեկվադի» էջից
