Aravot.am-ը Արցախի ԿԳՄ նախարար Լուսինե Ղարախանյանի մշակույթի գծով խորհրդական Մելանյա Բալայանից հետաքրքրվեց` որքանո՞վ է հավաստի Մաճկալաշեն գյուղի ֆեյսբուքյան էջի տարածած այն լուրը, թե Ամարասը մնում է Արցախի վերահսկողության ներքո:
«Ամարասի մասին քննարկումներ են գնում…Դրանք քաղաքական որոշակի հարցադրումներ են, որոնց ես տեղյակ չեմ: Եթե հստակ տեղյակ լինեի, չէի խուսափի երբեւիցե մեկնաբանություն տալուց»,-ասաց տիկին Բալայանը:
«Ամեն օր մեզ համար վատ իմաստով «անակնկալներ» են լինում, օրինակ` այն, որ մենք տեղյակ չէինք անգամ, որ Մարտակերտի այդ հատվածի գյուղերը նույնպես պետք է անցնեին հակառակորդի ձեռքը, կամ Տիգրանակերտի մասին որպես չեզոք տարածք…Այսինքն, ամեն օր ինքս ցավալի լուրեր եմ լսում: Համենայն դեպս, պետք է սպասենք, տեսնենք, թե ինչ է լինելու: Իհարկե, սպասելը մի քիչ էլ այն չէ, նաեւ պետք է մեր բողոքները բարձրաձայնենք, որ հասկանան, թե որքան անթույլատրելի է այսօր ոչ միայն Ամարասը «սկուտեղի վրա» հակառակորդին մատուցելը, նաեւ մեր մյուս տարածքները: Սրանք խնդիրներ են, պահեր են, որոնց պետք է լուրջ վերաբերվենք: Մի խոսքով, ես հստակ չեմ կարող մեկնաբանել Ամարասի ճակատագրի հարցը»,-հայտնեց Արցախի ԿԳՄ նախարարի մշակույթի գծով խորհրդականը:
Գոհար ՀԱԿՈԲՅԱՆ
