Եվրոպական հանձնաժողովը հայտարարել է հավելյալ 3մլն. եվրո մարդասիրական օգնություն տրամադրելու մասին, որը թույլ կտա տրամադրել անհետաձգելի աջակցություն Լեռնային Ղարաբաղի տարածքում և նրա շրջակայքում հակամարտության հետևանքով առավել տուժած քաղաքացիական բնակչությանը։ Ֆինանսավորումն իրականացվում է ի լրումն 900 հազար եվրո հատկացվելիք աջակցության, որը հայտարարվել էր հոկտեմբերի առաջին օրերին, երբ սկսվեցին ռազմական գործողությունները։
«ԵՄ-ը շարունակում է կանգնել հակամարտության հետևանքով տուժած բոլոր քաղաքացիական բնակիչների կողքին: Մենք ուղարկում ենք լրացուցիչ մարդասիրական օգնություն: Ես ողջունում եմ ռազմական գործողությունների դադարեցումը, ինչը պետք է կանխի հետագա մարդկային տառապանքները: Այդուհանդերձ , ես չափազանց մտահոգված եմ տեղահանված անապահով անձանց հումանիտար իրավիճակով, որոնք ստիպված են լինելու դիմակայել ձմեռային ծանր պայմաններին և կորոնավիրուսային համաճարակի հետևանքներին»,-նշել է ճգնաժամային կառավարման հարցերով հանձնակատար Յանեզ Լենարչիչը:
Արտակարգ իրավիճակներին ուղղված աջակցությունը կօգնի մարդասիրական օգնության ոլորտի ԵՄ գործընկերներին մարտերի հետևանքով տուժած անձանց տրամադրել հիմնական օգնություն, այդ թվում՝ սնունդ, ձմեռային պարագաներ, առողջապահական աջակցություն, բուժսարքավորումներ և այլ անհրաժեշտ: ԵՄ կողմից մարդասիրական օգնությանն ուղղված ամբողջ ֆինանսավորումը տրամադրվում է մարդասիրության, չեզոքության, անկողմնակալության և անկախության հումանիտար սկզբունքներին համահունչ:
Ընդհանուր տեղեկություններ
Կարդացեք նաև
Հայաստանի և Ադրբեջանի միջև տեղի ունեցած վերջին ռազմական առճակատումը, որը սկսվել էր սեպտեմբերի 27-ին, վերջին 25 տարիների ընթացքում հակամարտության ամենալուրջ սրումն էր: Հաղորդումներ են ստացվում մարդասիրական միջազգային իրավունքի տարբեր խախտումների վերաբերյալ, այդ թվում՝ քաղաքացիական ենթակառուցվածքների ենթադրյալ թիրախավորման կամ արգելված կասետային զինամթերքի օգտագործման: Հակամարտության հետևանքով կան հարյուրավոր զոհեր, հազարավոր վիրավորներ, որոնց շարքերում կան մեծ թվով խաղաղ բնակիչներ: Վեց շաբաթ տևած ռազմական գործողությունների ընթացքում լուրջ վնասներ են հասցվել բնակելի շենքերին և քաղաքացիական նշանակության ենթակառուցվածքներին, այդ թվում՝ դպրոցներին, հիվանդանոցներին, ճանապարհային ենթակառուցվածքներին, էլեկտրական ցանցերին՝ թողնելով երկարատև լուծումներ պահանջող հումանիտար հետևանքներ: Բախումները՝ ուժեղ գնդակոծությունների արդյունքում, հանգեցրել են նաև քաղաքացիական բնակչության զգալի տեղահանման: ԵՄ-ը պարբերաբար կապի մեջ է տեղում գործող մարդասիրական առաքելություն իրականացնող գործընկերների հետ՝ հակազդման ուղղված գործողությունները համակարգելու նպատակով: ԵՄ-ը ողջունում է Ռուսաստանի միջնորդությամբ ռազմական գործողությունների դադարեցման մասին համաձայնությունը, որը նոյեմբերի 9-ին համաձայնեցվել է Հայաստանի և Ադրբեջանի միջև։ Երկու կողմերին անհրաժեշտ է խստորեն պահպանել հրադադարը:
Հայաստանում Եվրոպական միության պատվիրակություն
