«Վստահաբար ասում եմ՝ Նարիշկինի այդ հայտարարությունն ուղղված չէ այսօր հարթակում կանգնած կուսակցություններին, հավանաբար, խոսքն այլ ուժերի մասին է: Այո՛, մենք ասում ենք, որ եռակողմ հայտարարությունն անընդունելի, բայց կայացած փաստ է, ասել ենք նաեւ, որ ռուսական խաղաղապահ ուժերի ներկայությունը տարածաշրջանում ստեղծված իրավիճակում անհրաժեշտություն է: Մենք չենք հայտարարել, որ այդ համաձայնագիրը պետք է չեղարկվի, մենք հայտարարում ենք, որ անհրաժեշտ է նոր կառավարություն, նոր բանակցող ստեղծված իրավիճակից առավել հայանպաստ լուծումներ գտնելու համար, ու մենք այդ հնարավորությունը տեսնում ենք, այդ հնարավորությանը կարելի է հասնել առանց պատերազմի, ճիշտ բանակցությունների միջոցով, ինչը Նիկոլ Փաշինյանը չի կարող»,- Aravot.am-ին ասաց ՀՅ Դաշնակցության Հայաստանի ԳՄ ներկայացուցիչ Իշխան Սաղաթելյանը՝ անդրադառնալով ՌԴ Արտաքին հետախուզության ծառայության ղեկավար Սերգեյ Նարիշկինի այն հայտարարությանը, թե իրենց ունեցած տեղեկություններով, արեւմտյան որոշ երկրներ փորձում են Ադրբեջանի ու ՀՀ ազգայնականներին հրահրել, որ վարկաբեկեն եռակողմ համաձայնագիրը:
Հարցին՝ տեսնո՞ւմ են կոնկրետ ուժեր Հայաստանում, որոնք ըստ Նարիշկինի, հրահրվում են արեւմտյան ուժերի կողմից, մեր զրուցակիցը պատասխանեց. «Մենք տեսնում ենք Հայաստանում այլ խմբեր, որոնք ուզում են այս պարտության մեղքը բարդել Մոսկվայի վրա, այդ կարծիքը մենք չենք կիսում, որովհետեւ մեր ունեցած տեղեկություններով՝ ե՛ւ մատակարարման, ե՛ւ շատ հարցերում իրենք իրենց պարտավորությունները կատարել են: Այդ ուժերը բոլորին հայտնի են, նույնիսկ անունը չեմ ուզում տալ, դրանք այն ուժերն են, որոնք 2,5 տարի հետեւողականորեն փչացրին հայ-ռուսական հարաբերությունները, այն ուժերն են, որոնք ազդեցություն ունեն Փաշինյանի վրա, դրանք Նիկոլի շրջապատի արեւմտյան տարբեր ծրագրերից օգտվող հասարակական եւ քաղաքական կազմակերպություններն են, որոնց մասին բոլորը գիտեն»:
Արփինե ՍԻՄՈՆՅԱՆ
