«Future Studios»-ը վեբինար էր կազմակերպել «Խոսում է Արցախը. պայքարի արժանապատիվ մարտեր․ դիվանագիտություն և միջազգային իրավունք» թեմայով»։
Միջազգային փաստաբան, Paris Pantheon Assas համալսարանի միջազգային իրավունքի դոցենտ հետազոտող, Մարդու իրավունքների միջազգային ֆեդերացիայի նախկին քարտուղար Րաֆֆի-Ֆիլիպ Կալֆայանը իր խոսքում նշեց, որ Հայաստանի, Ադրբեջանի և Ռուսաստանի ղեկավարների ստորագրած փաստաթուղթը ավելին է, քան հրադադարը, քանի որ այն տարածքային սահմանազատման տարրեր է պարունակում։
«Իրականում, տարածքային սահմանազատումը սահմանվել է համաձայնագրի օրը, ինչը նշանակում է, թե կողմերի զորքերը որտեղ են կանգնելու։ Այսպիսով՝ մենք չենք կարող ասել, որ սա ժամանակավոր սահմանազատում է։ Այդ պատճառով նախագահ Պուտինը իր հայտարարությունում նշել էր, որ այժմ Ղարաբաղի վերջնական կարգավիճակի մասին մտածելու և այն քննարկելու ժամանակն է։ Սա նաև Ֆրանսիայի և Միացյալ Նահանգների դիրքորոշումն է»,- ասաց նա։
Րաֆֆի-Ֆիլիպ Կալֆայանը նկատեց, որ ըստ Հայաստանի Սահմանադրության, նման փաստաթուղթը պետք է վավերականացնի Ազգային ժողովը, հակառակ դեպքում՝ այն վավեր չէ․ «Քանի դեռ Հայաստանի խորհրդարանը այն չի վավերացրել, այն իրավական առումով պարտադիր չէ հայերի համար։ Ինչևէ, քաղաքական իրականությունը այս իրավիճակին դժվարություններ է ավելացնում, քանի որ Հայաստանը այս պահին չի կարող թույլ տալ վերադարձ պատերազմին, այսպիսով` պետք է ընդունի այդ փաստաթղթի դրույթների իրականացումը։ Եթե որոշի չիրականացնել, ապա կրկին պատերազմ է սկսվելու, և հավանաբար նախագահ Պուտինը, որը միջնորդ էր այս գործարքում, ուրախ չի լինի։ Այսպիսով՝ մենք այս համաձայնագրի իրականացումից փախչել չենք կարող, բայց այս պահին պետք է վերադառնանք դիվանագիտական խողովակներին»։
Կարդացեք նաև
Ամի ՉԻՉԱԿՅԱՆ
