Ռուսաստանի ՊՆ ներկայացուցչի ճեպազրույցը Լեռնային Ղարաբաղում իրավիճակի շուրջ
Ռուսաստանի խաղաղապահ ուժերի ստորաբաժանումները շարունակում են Լեռնային Ղարաբաղի տարածքում հրադադարի պահպանման ռեժիմի նկատմամբ վերահսկողություն իրականացնելու իրենց առաջադրանքը: Հյուսիսային եւ հարավային գոտիներում իրականացվում է իրավիճակի եւ հրադադարի ռեժիմը պահպանելու ռեժիմի շուրջօրյա մոնիթորինգ, որը ռուսական խաղաղապահները իրականացնում են 23 կետերում:
Հրադադարի ռեժիմը պահպանվում է շփման գծի ամբողջ երկայնքով:
Ռուս խաղաղապահների հսկողության ներքո իրականացվում է բնակչության եւ քաղաքացիական ավտոտրանսպորտի տեղաշարժը Լաչինի միջանցքով: Մեկ օրում Հայաստանից դեպի Լեռնային Ղարաբաղ ապահովվել է 1190 փախստականների անվտանգ վերադարձ, որոնք ավելի վաղ իրենց տները լքել էին ռազմական գործողությունների պատճառով: Նոյեմբերի 14-ից ի վեր ռուս խաղաղապահների աջակցությամբ բնակության նախկին վայրեր վերադարձել է Լեռնային Ղարաբաղի ավելի քան երեք հազար բնակիչ:
Կարդացեք նաև
Ձեռք բերված պայմանավորվածությունների համաձայն՝ Լեռնային Ղարաբաղում շարունակվում է հակամարտության ընթացքում զոհված զինծառայողների դիակների փոխանակումը: Այն իրականացվում է Ռուսաստանի խաղաղապահ ուժերի եւ Կարմիր Խաչի միջազգային կոմիտեի համակարգմամբ:
Նոյեմբերի 19-ին Ռուսաստանի խաղաղապահ ուժերի պարեկները Շուշի բնակավայրից դեպի Ադրբեջանի տարածք Ադրբեջանի զինված ուժերի հինգ մեքենաների անվտանգ տեղափոխում են ապահովել:
Շարունակվում է խաղաղապահ զորքերի անձնակազմի, ռազմական տեխնիկայի եւ նյութական գույքի փոխադրումը Ռուսաստանի ռազմաօդային տրանսպորտ ԻԼ 76 եւ ԱՆ 126 օդանավերով: Նոյեմբերի 10-ից իրականացվել է 206 չվերթ, այդ թվում՝ ընթացիկ օրում 22 չվերթ: Տեղափոխվել է ավելի քան 40 միավոր հատուկ տեխնիկա: Հայաստանի տարածք տեղափոխվել են բարձր անցողունակությամբ բեռնատար ավտոմեքենաներ, ինժեներական տեխնիկա, ինչպես նաեւ նյութատեխնիկական ապահովման տեխնիկա, այլ գույք:
Լեռնային Ղարաբաղում մարդասիրական հարցերի՝ քաղաքացիական ենթակառուցվածքների վերականգնման նպաստելու նպատակով Ստեփանակերտ քաղաքում Ռուսաստանի ղեկավարությամբ շարունակվում է հումանիտար արձագանքի միջգերատեսչական կենտրոնի ձեւավորումը: Խաղաղասիրական խնդիրները լուծելու եւ հնարավոր միջադեպերը կանխելու համար ուղիղ կապով համագործակցություն է իրականացվում Ադրբեջանի եւ Հայաստանի ԶՈՒ ԳՇ-ի հետ:
Աշոտ ՀԱԿՈԲՅԱՆ
