«Զինված ուժերի կիրառման պլանի մեջ այդպիսի օբյեկտներ չկան, և դա ճիշտ է, քանի որ դա որևէ ազդեցություն չունի հակառակորդի ռազմական պոտենցիալի վրա»,-հարցին՝ Ադրբեջանի նավթատարներին, ջրամբարներին հարվածելու քննարկում եղե՞լ է, մամուլի ասուլիսում այսպես պատասխանեց ՀՀ ՊՆ ռազմական վերահսկողական ծառայության նախկին պետ Մովսես Հակոբյանը:
Լրագրողների խնդրանքով Մովսես Հակոբյանն անդրադարձավ ԱՀ նախագահ Արայիկ Հարությունյանի այն հայտարարությանը, որ ՀՀ-ից եկած ԱԱԾ-ի ամենաուժեղ, էլիտար ստորաբաժանումներ հրաժարվել էին գալ «Եղնիկներ»: Նա ասաց. «Այս իրողությունն իրականությանը համապատասխանում է: Բայց հենց պրոբլեմն այն է, որ երբ Արայիկ Հարությունյանն իրեն իրավունք է վերապահում որևէ ստորաբաժանման խնդիր առաջադրել, առավել ևս ԱԼՖԱ ստորաբաժանման պատրաստության մեջ չի մտնում խրամատում նստել, մարտ վարել: Իրենք, եթե դա անեն, ավելի վատ է լինելու, քան երկու ամիս ծառայած զինվորը, քանի որ իրենք մարտ վարել են սովորում խրամատի մոտ»:
Հարցին՝ չի՞ վախենում իր ձերբակալությունից, Մովսես Հակոբյանը պատասխանեց. «Ավելի լավ: Բանտում քիչ եմ եղել, մի քիչ էլ կնստեմ, որևէ սարսափելի բան չկա: Բանտն էլ է մարդու համար»:
Հարցին՝ իսկ ինչո՞ւ «Իսկանդերը» չկիրառվեց, Մովսես Հակոբյանն այսպես արձագանքեց. «Իսկանդերը» կիրառվել է, բայց չեմ ասելու, թե որ տեղի վրա»:
Կարդացեք նաև
Լրագրողները հետաքրքրվեցին՝ զինվորականները կխոսե՞ն, մանավանդ ասաց, որ ձայնագրություն էլ կա, նա պատասխանեց. «Մեր զինված ուժերում այնքան դաստիարակված, կարգապահ զինվորներ են, որ որևէ զինվորական ձեզ հարցազրույց չի տալու, եթե չզորացրվի»:
Դիտարկմանը, բայց դավաճանություն է եղել, մի՞թե պետք չէ , որ խոսեն, և բացահայտվի, Մովսես Հակոբյանն այսպես արձագանքեց. «Դավաճանություն բառը ես ձեզ հետ չեմ կիսում: Սխալ թույլ տալը, սխալների մեջ, եթե որակենք, որ կա հանցակազմ, չեմ կարող ևս գնահատական տալ: Ես ասել եմ այն, ինչ կատարվել է: Գնահատական տալը մեր գործը չէ»:
Տաթև ՀԱՐՈՒԹՅՈՒՆՅԱՆ
