Ավելի քան 5.7 միլիոն կորոնավիրուսի դեպքեր և մոտավորապես 355 հազար մահ է հաղորդվել ԱՀԿ-ին։ Այս մասին լրագրողների հետ առցանց հանդիպման ընթացքում ասաց Առողջապահության համաշխարհային կազմակերպության Եվրոպայի տարածաշրջանային գրասենյակի ղեկավար Հանս Քլյուգեն։ Նա նշեց, որ նոյեմբերին Եվրոպայի տարածաշրջանային գրասենյակին զեկուցված դեպքերը 4 միլիոնով ավելին են:
«Վերջին շաբաթներին COVID-19-ով պայմանավորված մահերը ավելացել են 18 տոկոսով։ Վերջին շաբաթվա ընթացքում Եվրոպայում գրանցվել են ավելի քան 29 000 մահվան նոր դեպքեր, ինչը նշանակում է՝ Եվրոպայի տարածաշրջանում յուրաքանչյուր 17 վայրկյանի ընթացքում մեկ մարդ է մահանում կորոնավիրուսից»,- ասաց նա։
Հանս Քլյուգեի խոսքով՝ եթե յուրաքանչյուր քաղաքացի հետևի կանոններին, ապա լոքդաուններից կարելի է խուսափել։ Մասնավորապես՝ նա համարում է, որ եթե քաղաքացիների 95 տոկոսը դիմակներ կրի, ապա լոքդաունները անհրաժեշտ չեն լինի։
Նա նշեց նաև, որ տեխնոլոգիաները և դեղագործական զարգացումները առաջարկում են նոր հորիզոններ․ «Մինչդեռ պատվաստանյութերը չեն կարող ամբողջովին կանգնեցնել COVID-19-ը և չեն կարող բոլոր հարցերին պատասխան տալ, նրանք իրենցից մեծ հույս են ներկայացնում այս վիրուսի դեմ պատերազմում։ Վերջին օրերի ընթացքում մենք լավ նորություններ ենք ստացել՝ 2 խոստումնալից պատվաստանյութերի վերաբերյալ։ Ինչևէ, այս խոստումը երբեք չի կատարվի, եթե մենք վստահ չլինենք, որ բոլոր պետությունները հասանելիություն ունեն պատվաստանյութերի շուկային, և որ այն հավասարապես կառաքվի»։
Կարդացեք նաև
Հանս Քլյուգեն ընդգծեց, որ երեխաների համար պետք է ապահովել անվտանգ ուսում և վստահ լինել, որ նրանք կվայելեն գալիք տոները․ «Սա լինելու է ուրիշ Սուրբ Ծննդյան տոն, բայց դա չի նշանակում, որ այն չի լինի ուրախ»։
Ամի ՉԻՉԱԿՅԱՆ
