«Հրամանն ինչպես հրապարակվել է՝ չի համապատասխանում իմ զեկուցագրի էությանը»,- «Հայելի» ակումբում լրագրողների հետ հանդիպմանը հայտարարեց ՀՀ ՊՆ ռազմական վերահսկողական ծառայության նախկին պետ Մովսես Հակոբյանը:
Հիշեցնենք՝ նոյեմբերի 18-ին նա ազատման դիմում է ներկայացրել:
Մովսես Հակոբյանն ասաց՝ նախարարին խնդրել է, որ հրաման արձակի այնպես, ինչպես գրված է իր զեկուցագրի մեջ, նա չի համաձայնել. «Կարծում եմ՝ առանձին փորձենք շտկել, եթե ոչ, կբողոքարկենք, և հրամանը կգրվի այնպես, ինչպես ազատման դիմումում: Իմ զեկուցագրի մեջ գրված է իմ զորացրման պատճառը, ճշմարտությունը»:
Մովսես Հակոբյանն ասաց՝ իրեն վիրավորում է նախկին-ներկա պաշտոնյա բառերը. «Այդ տեմպով շարունակելով՝ մենք ասելու ենք, որ նախկին կամ ներկա իշխանության ժամանակ այս մարդը ծնվել է, ուրեմն կամ պիտանի է, կամ ոչ: Կամ այս ծառը տնկվել է այս կամ այն իշխանության ժամանակ, ուրեմն սրա հովը լավն է, թե ոչ: Ամեն ինչ պետք է դնես թվերով, թե ինչ է կատարվել բանակում»:
Կարդացեք նաև
Մովսես Հակոբյանը ներկայացրեց նաև իր պաշտոնից ազատվելու պատմությունը. «Երբ ես ազատվել եմ ԳՇ պետի պաշտոնից, իսկ ես հեշտ չեմ ազատվել, քանի որ վարչապետն իրավասու չէ ինձ ազատելու այդ պաշտոնից: Այդպիսի որոշում կայացրել է, ես ասել եմ, եթե հրամանը գրեք, ես բողոքարկելու եմ. պիտի հիմնավորեք: ԳՇ պետին հանելու հիմքեր պիտի լինեն, նա նախարար չէ, վարչապետ չէ, դա ավելի լուրջ պաշտոն է: Կարող է որևէ քաղաքական պաշտոնյայի վիրավորեցի: Ես այդպես եմ գտնում, ես հիմնավորում եմ պահանջել վարչապետից ինձ պաշտոնից ազատելու համար: Դա տևել է հինգ օր, հինգ օր անընդմեջ մտել եմ, պահանջել եմ հիմնավորում: Եթե գիտեք՝ ես ազատման դիմում չեմ գրել, հիմնավորում բերել է, որն ինձ բավարարել է, և ես ասել եմ՝ իրավունք ունեք հրաման գրեք, ես չեմ բողոքարկելու: Նաև առաջարկել եմ պաշտոնյա, ով կարող է ինձ փոխարինել: Եվ պատրաստ եմ եղել նրա կողքին կանգնել: Ես չեմ ակնկալել, որ վարչապետն ինձ հետ այդ հարցում պիտի խորհրդակցի, բայց կառավարության նիստում հայտարարել է, որ նոր ԳՇ պետի հարցը կքննարկի ինձ հետ, և ես հասկացել եմ, որ վարչապետն այդ քանի օրվա զրույցներից հետո ինձ հասկացել է: Երբ այդ օրը երեկոյան հինգերորդ բանակային կորպուսի հարցով գնացել եմ աշխատանքներ կատարելու, իմացել եմ, որ ԳՇ պետ է նշանակվել, մինչդեռ այդ օրը ժամը 19,00-ին վարչապետի մոտ պիտի մտնեի: Երբ իմացա՝ ում է նշանակել, այսպիսի արտահայտություն եմ արել՝ Դուք նշանակել եք ԳՇ պետին ամենից անպատրաստ գեներալին: Այդ օրվանից սկսվել է բանակի քանդման գործընթացը»: Հիշեցնենք, որ նրանից հետո գլխավոր շտաբը ղեկավարեց Արտակ Դավթյանը:
Մովսես Հակոբյանն ասաց՝ որոշումը վաղուց է կայացրել, որպեսզի զորացրվի բանակից՝ դեռ հոկտեմբերի 5-ին. «Այն ժամանակ չեմ գրել դիմում, քանի որ հաշվի եմ առել, որ պատերազմի ընթացքում իմ որոշումը վնաս է հասցնելու զինված ուժերին և որոշել եմ սպասել մինչև պատերազմի ավարտը: Չնայած այդ ընթացքում ես այդ որոշումը կայացրել եմ, բայց շարունակել եմ իմ հնարավորությունների սահմաններում աջակցել բանակին, իմ խորհուրդներով, ինչպես նաև միջնորդների միջոցով նաև ռազմաքաղաքական իշխանությանը»:
Մովսես Հակոբյանը հայտնեց՝ իր վերջնական որոշումը կայացրել է ՀՀ վարչապետ Նիկոլ Փաշինյանի՝ գիշերվա գրառումից հետո, երբ կոչ արեց կռվող տղաներին վերադառնալ հրապարակ և իր խոսքերով վնգստացողներին դուրս մղել հրապարակից:
Մովսես Հակոբյանը հիշեցրեց՝ զինվորականներն առանց համապատասխան թույլտվության չեն կարող լրատվամիջոցներին տալ տեղեկություններ, և այդ որոշման հեղինակներից մեկն էլ ինքն է եղել: Մովսես Հակոբյանն ասաց՝ դա ճիշտ է: Հենց դա է պատճառը, որ ինքը ոչ մի լրատվամիջոցի այդ տեղեկությունը չի հայտնել:
Տաթև ՀԱՐՈՒԹՅՈՒՆՅԱՆ
