Գերմանիայի արտգործնախարար Հեյկո Մաասը հնարավոր է համարել, որ Եվրամիության երկրները դեկտեմբերին կայանալիք գագաթնաժողովին կարող են քննարկել Անկարայի դեմ պատժամիջոցների հարցը՝ պայմանավորված Արևելյան Միջերկրածովում նրա գործողությունների հետ, հաղորդում է «ՌԻԱ Նովոստին»:
«Ամեն անգամ, ցավոք, տեղի են ունենում նոր սադրանքներ… Եթե մինչև դեկտեմբեր Թուրքիայից դրական ազդակներ չստանանք, եթե հետագայում էլ լինեն սադրանքներ, ինչպիսին էր Էրդողանի այցը Հյուսիսային Կիպրոս, ապա կլինեն շատ բարդ քննարկումներ (ԵՄ գագաթնաժողովին-խմբ.)»,- ասել է Մաասը ԵՄ արտգործնախարարների խորհրդակցությանը:
Նրա խոսքով՝ առայժմ Թուրքիայի և Հունաստանի միջև հակամարտության կարգավորման փորձերն այնպիսի արդյունքի չեն հանգեցրել, որը կբավարարի Եվրոպային: Պատասխանելով այն հարցին, թե արդյոք պատժամիջոցներ կկիրառվեն Անկարայի դեմ, նախարարն ասել է, որ ԵՄ-ը այդ հարցը նախկինում էլ է բարձրացրել: Մաասը հստակ անուններ չի նշել, բայց ակնարկել է, որ այդ հարցը նախկինում առաջադրել են Հունաստանը և Կիպրոսը:
«Եթե Թուրքիայի հետ հարաբերությունների բարելավում չլինի, ապա ես ելնում եմ նրանից, որ թեման (պատժամիջոցների-խմբ.) կրկին կբարձրացվի դեկտեմբերին ԵՄ խորհրդի ժամանակ»,- հայտարարել է Մաասը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
