«ՀՀ-ն դե ֆակտո չունի պատասխանատու, իր երկրի մասին մտածող, հոգ տանող, իր ժողովրդի անվտանգության մասին մտածող վարչապետ»,- Ազատության հրապարակում, Նիկոլ Փաշինյանի հրաժարականի պահանջով հանրահավաքի ժամանակ ասաց պրոդյուսեր Ռուբեն Մխիթարյանը:
Նրա բնութագրմամբ, տարիներ անց հայոց լեզվի բացատրական բառարանում երկու փոփոխություն է տեղի ունենալու. «Սուտասան բառի կողքին տպվելու է Փաշինյան Նիկոլի պատգամավոր ժամանակվա նկարը, իսկ դավաճան բառի կողքին՝ Փաշինյանի վարչապետ եղած ժամանակվա նկարը»:
Դիմելով Նիկոլ Փաշինյանին, Ռուբեն Մխիթարյանն ասաց. «Անցել է համարյա 10 օր, ռազմական գործողությունները վերջացել են, դու ուղիղ եթեր ես մտնում, քո թույն ու թարախ դեմքը… ես գետինն եմ մտնում քո փոխարեն: Քո սաղ պատգամավորները ամեն մեկը 100 հատ ֆեյք բացած, իրենց լկտի երախները բացած՝ էս երկիրը տարան կործանման… Դու փոխանակ, դերասան, ծնկի իջնեիր, ներողություն հայցեիր բոլոր որդեկորույս մայրերից, հելել հաթաթա ես տալիս, ասում ես՝ հնար չկար: Ես կյանքում ծնկի չեմ եկել, էստեղ կանգնած արժանապատիվ տղամարդիկ ծնկի չեն եկել, էստեղ կանգնած հայերը ծնկի չեն եկել, բայց ես ձեր փոխարեն, ստահակներ, ծնկի եմ գալիս ու ներողություն եմ խնդրում բոլոր որդեկորույս մայրերից»։
Բանախոսն անդրադարձավ նաեւ իշխանական պատգամավոր Արփի Դավոյանի այն հայտարարությանը, թե ցուցարարները ԱԺ-ի դռների բռնակներն են կորցրել ու դրա համար ընդդիմադիրները պետք է ամաչեն:
Կարդացեք նաև
«Վերջերս մենք իմացանք, որ ԱԺ բռնակները շատ ավելի կարեւոր դեր ունեն հայապահպանության գործում, քան մեր ԶՈւ-ն: Ուրեմն, տիկին, էդ որ հելար՝ ասեցիր՝ չեք ամաչում, կոտրած բռանկներին նայեք… Շուշիի եկեղեցու պղծված քարերին նայելով՝ չեք ամաչո՞ւմ, Քարվաճառում տներն այրող, Հայաստան գաղթող մարդկանց երեսին նայելով՝ չեք ամաչո՞ւմ: Ուրեմն՝ դուք ասում եք՝ ժամանակ տվեք մեզ՝ լուծենք սաղ հարցերը, տո այ թուլամորթներ, 5 ժամ առաջ իմացանք, որ Մարտակերտի եւս 7 գյուղում մտել ասել են՝ վեշերդ հավաքեք գնացեք, սա էլ է թուրքինը»,- ասաց Ռուբեն Մխիթարյանը:
Բանախոսը ռազմական ոլորտում Նիկոլ Փաշինյանի ամենամեծ ձեռքբերումը ելակն է համարում: Ապա դիմելով իշխանական պատգամավոր Բաբկեն Թունյանին, Ռուբեն Մխիթարյանն ասաց. «Էդ, որ դու փեշերդ փռած պաշտպանում ես էդ մարդուն, ասում ես՝ մեզ ժամանակ տվեք… ընկեր, մի հատ կենցաղային օրինակ բերեմ, որովհետեւ այնպես է ստացվել, որ դու գլխավոր պողոսագետն ես, չնայած՝ էդ բոլոր 88-դ էլ «պողոս» եք … հիմա ենթադրենք՝ քո հարեւան Պողոսը վարորդ է, 4 ուղեւոր Ա կետից տանում է Բ կետ, հարբում է, մեքենան խփում է պատին, ինքը փրկվում է, 4-ը մահանում են, դու դրանից հետո էդ վարորդին դպրոցական ավտոբուս վարել, որտեղ քո երեխաներն են, կվստահե՞ս»:
Ռուբեն Մխիթարյանի գնահատմամբ, այս ընթացքում Նիկոլ Փաշինյանն ու իր կինը միայն մեղավորներ են փնտրել եւ ատելությունն են մեծացրել:
Նելլի ԳՐԻԳՈՐՅԱՆ
