ԱԺ-կառավարություն հարցուպատասխանի ժամանակ այսօր ՀՀ վարչապետ Նիկոլ Փաշինյանն անդրադարձավ հարցին, թե ինչպես է ապահովվելու եռակողմ հայտարարության մեջ մատնանշված կետերից մեկը՝ փախստականների վերադարձն Արցախ:
«Այսօր հրապարակված ճանապարհային քարտեզում մատնանշվում է բանակցային գործընթացի վերականգնումը Մինսկի խմբի համանախագահության ձեւաչափում: Ենթադրվում է, որ այդ քննարկումները եւ բանակցությունները պետք է տան համատեղ հայտարարության մեջ նշված կետերի հետագա իրագործման հնարավորությունների մեխանիզմների ձեւավորման հետ կապված պատասխանները: Այո, փախստականների վերադարձի իրավունքը նախատեսված է եւ մենք պետք է ամեն ինչ անենք, որ այդ իրավունքն իրացվի լիարժեք՝ մեր հայրենակիցների անվտանգության, արժանապատվության եւ բնականոն կյանքի երաշխիքների ապահովմամբ: Դեռ հարցեր են կան պարզաբանման ենթակա՝ ինչպե՞ս, ի՞նչ գրաֆիկով, ո՞ւմ ուղեկցությամբ, ո՞ւմ վրա է անվտանգության ապահովումը: Դրանք հետագա քննարկումների առակա պետք է դառնան»,-նշեց Նիկոլ Փաշինյանը:
Լուիզա ՍՈՒՔԻԱՍՅԱՆ
