Ղարաբաղյան հակամարտությունը պետք է կարգավորվի ԵԱՀԿ Մինսկի խմբի շրջանակներում, հայտարարել է Միացյալ Նահանգների պետքարտուղար Մայք Պոմպեոն ֆրանսիական Le Figaro օրաթերթի հետ զրույցում, հայտնում է «Ազատությունը»։ Նախօրեին ամերիկյան դիվանագիտության ղեկավարը ֆրանսիական մայրաքաղաքում էր, որտեղ հանդիպումներ է ունեցել նախագահ Էմանուել Մակրոնի և արտգործնախարար Ժան-Իվ Լը Դրիանի հետ:
«Միացյալ Նահանգները Ֆրանսիայի և Ռուսաստանի հետ հանդիսանում են Մինսկի խմբի համանախագահներ, որի գլխավոր նպատակը Լեռնային Ղարաբաղում հակամարտության կարգավորումն է։ Հենց այդ շրջանակներում պետք է կարգավորվի իրավիճակը», – Le Figaro-ի հետ զրույցում շեշտել է Պոմպեոն: Պետքարտուղարը հատուկ ընդգծել է՝ Վաշինգտոնը մտահոգված է Թուրքիայի ռազմական ներուժի աճի կապակցությամբ։
«Նախագահ Էմանուել Մակրոնը և ես համակարծիք ենք, որ Թուրքիայի վերջին գործողություններն ագրեսիվ էին», – ասել է պետքարտուղարը՝ մատնացույց անելով ղարաբաղյան հակամարտությունում Թուրքիայի աջակցությունը Ադրբեջանին, ինչպես նաև Անկարայի ռազմական գործողությունները Լիբիայում և Միջերկրական ծովում։
«Եվրոպան և Միացյալ Նահանգները պետք է համատեղ աշխատեն՝ համոզելու Էրդողանին, որ նման քայլերը չեն բխում իր ժողովրդի շահերից», – ասել է ամերիկյան դիվանագիտության ղեկավարը։
Կարդացեք նաև
Լուսինե ՄՈՒՍԱԵԼՅԱՆ
Նյութն ամբողջությամբ՝ սկզբնաղբյուր կայքում:
